Bhubaneswar, Jylliew:
Na ka jingsakhi ba la nang kiew shuh shuh ka jingktah jong ka jingpang Covid-19, ka sorkar jylla ha kine ki khyndiat sngi ba la leit, ka la kyntu ïa ki briew kiba don ïa ki dak ki shin jong ka jingpang Covid ba kin kiar na ki jingïalang paidbah ha ka Rath Yatra kaban sa wan kum shi bynta ban ïada bad khanglad ïa ka jingsaphriang jong u khñiang jingpang.
Kane ka tamasa kali kaba man la u snem, kaba la thmu ban sdang naduh ka 27 tarik u Jylliew, ka khring da ki lak ngut ki riewngeit na kylleng ka ri bad nabar ri sha ka nongbah bakhuid jong ka Puri. Ka jingïalang ha ki katto katne ki distrik ka sakhi ruh ïa ki jingïalum briew kaba bun.
U Director ka tnad ka koit ka khiah u Dr Amarendra Nath Mohanty u la ong, “kito kiba don ki dak ki shin jong ka jingpang Covid-19 ki dei ban kiar na kaba leit sha ki jingïalum ha ka Rath Yatra.
Ki tymmen bad kito kiba don ïa ki jingpang ba ïadei bad ki jingpang ki dei ban kiar na ki jingïalang kiba bun briew. Ki briew kiba ïashim bynta ha ka tamsa kin hap ban deng da ki Mask bad ban bud ïa ki kyndon ba la buh kum ka lad ban ïada na ka jingpang Covid.”
U Dr. Mohanty u la pyntip ba ki sienjam ki dang shim ban pyntreikam biang ïa ki ICU kiba la buh ha ka por ba wan ka khlam Covid-19 ba la dep ha Puri.
La pynbeit ïa ki jingthiah ba kham bun ha District Headquarters Hospital (DHH) katba yn sa pyntreikam shuh shuh ïa ki doktor bad ki nongtrei ka koit ka khiah. La pynbiang ruh ïa kane ka hospital da ki tiar sumar bad ki jingdonkam ban pynïaid ha ka por ba donkam kyrkieh.
Ka sorkar ka la bthah ruh ïa ki distrik ban long kiba husiar bha bad ban pynkhlaiñ ïa ki rukom peitngor ïa u Covid bad ki rukom ai jingïarap ba kyrkieh.
La bthah ïa ki distrik ban pynthikna ïa ka jingpynkhreh ban treikam jong ki karkhana pynmih Oxygen, ka jingdon jong ki jingthiah ha ki jaka sumar, ki jaka sumar ïa kiba pang ba shitom bad ka jingdon jong ki dawai ba kongsan.
Ha kajuh ka por, ka jylla ka la don 15 ngut ki nongpang Covid-19 ha ki ar sngi ba la leit bad ka jingkheiñ ka la poi sha ka 38 ngut haduh ka sngi Saitjaiñ.
U Director jong ka Public Health u Dr Nilakanta Mishra u la ong ba ka jinglong jingman ka la don hapoh ka jingtehlakam.
“Ka jylla ka don kumba 29 ngut ki briew ba shah ktah ha ka jingpang hadien ba khyndai ngut kiwei pat ki la ïoh jingkoit na ka jingshah ktah ha ka jingpang. Ka jinglong jingman jong kiwei ka long kaba biang bad ym don uwei ruh uba shah ktah jur,” u la ong.
Ki riew shemphang ha ka liang ka koit ka khiah ki la pynpaw ha shwa ïa ka jingma kaba lah ban mih na ka jingïalum briew, khamtam ka jingïaid lynti jong ki jait jingpang JN.1 ha Odisha.
