New Delhi, Jylliew:
U Myntri Rangbah barim ka Delhi, Manish Sisodia, u la ïaidlait na ka jingshah khot hajir jong ka ACB jong ka sorkar Delhi ha kaba ïadei bad ka mukotduma ba la kynnoh bamsap ha kaba shna ïa ki kamra klas ha ki skul sorkar, kaba dei ban long ha ka Lah Sngi U Blei, la ïathuh ki tyllong khubor.
Ka Anti-Corruption Branch (ACB) ka la khot hajir ïa u nongïalam ka AAP u Manish Sisodia bad ïa u Myntri barim ka tnat PWD u Satyendar Jain ban shah tohkit. Katba u Jain u la leit hajir hakhmat ka ACB ha ka sngi Thohdieng, hynrei u Sisodia pat u dei ban leit hajir ha ka lah sngi U Blei.
U Jain u la shah tohkit palat san kynta ha ka kynhun ACB.
“U nongïasaid aiñ jong u Manish Sisodia u la pyntip ïa ngi ba un nym lah ban wan mynta ka sngi. Yn sa khot biang ïa u,” la ong ka tyllong khubor na ka kynhun ACB. Katkum ki tyllong khubor jong ka AAP, u Sisodia u la don ka jingïateh lok kaba la thmu lypa bad um shym la lah ban wan mih hakhmat ka ACB.
U nongïasaid aiñ jong u u la phah ïa ka jubab sha ka ACB, la ïathuh ki tyllong khubor jong ka seng.
Kane ka jingkhot hajir ka la wan hadien ba ka ACB ka la ujor ejahar halor kane ka kam ha ka 30 tarik, Ïaïong halor ka jingkynnoh ba don ka jing-leh be-aiñ ha ka liang ka pisa tyngka haduh T.2,000 klur ha kaba tei ïa palat 12,000 tylli ki kamra klas ne ki jingtei ba shiteng por ha ki skul sorkar ha Delhi.
