Bhubaneswar, Jylliew:
Kum ka jingpyntikna, ba ka sorkar Odisha ka la kut jingmut ban pynkynriah noh ïa ki nong Bangladesh kiba sah beaiñ ha kane ka jylla, u Myntri Rangbah ka jylla u Mohan Charan Majhi ha ka lah sngi U Blei u la kyrpad ïa ki pulit bad ki bor pynïaid distrik jong ka Kendrapara ba kin leh da kaba tyngeh ïa kum kine ki briew namar ki lah ban buh
U la ong ba ïa ki jingpynkynriah yn leh katkum ka aiñ jong ka ri.”Ki pulit trai ri ki donkam ban ïatreilang bad ki kynhun jong ka sorkar pdeng ban ïaleh pyrshah ïa ka mat kaba eh jong ka jingwan buhai shnong beaiñ,” la ong u Majhi.
Haba bishar bniah ïa ka jingpyntreikam ïa ki prokram sorkar ha ka distrik, u la bthah ïa ki pulit ban wad ïa ki nongshong shnong beaiñ da ka jingïarap jong ka bor synshar bad ban sdang ïa ki sienjam ban pynkynriah noh ïa ki.
“Baroh ki nongwan buhai shnong la ki dei na Bangladesh ne na kano kano ka ri yn leh da kaba tyngeh,” u la ong da kaba bynrap ba ka sorkar jylla ka bud ïa ka kyndon pyntreikam pyrshah ïa ki bar jylla kiba wan shong shnong khlem ki kot ki sla kiba biang namar ki long beit ka jingma ïa ka jingshngaiñ ka ri India.
U Majhi uba bat ruh ïa ka tnad ki kam pohïing u la pyntip sha ka ïingdorbar ha u bnai Lber ba la ithuh ïa 3,738 ngut ki nong Bangladesh kiba wan rung tuh ha kane ka jylla.
Ka Kendrapara ka wan hakhmat duh ha ka thup jong ki bar ri kiba don 1,649 ngut bad bud sa 1,112 ngut ha Jagatsinghpur, 655 ngut ha Malkangiri, 199 ngut ha Bhadrak, 106 ngut ha Nabarangpur bad 17 ngut ha Bhubaneswar.
Ki la don haduh 1,711 ngut ki nong Bangladesh na ki rud duriaw jong ka Odisha ki la ïoh ïa ka jingthoh ‘Quit India’ ha u snem 2005 katkum ki kyndon jong ka Foreigners Act. Hynrei ïa ka jingtreikam ban pynkynriah noh ïa ki la pynsangeh noh da ka sorkar pdeng hapdeng ki jingkynnoh ba la ithuh bakla ïa ki nongwei ba la suba, ong u heh sorkar.
Hynrei 21 ngut ki nong Bangladesh ki la shah pynphai noh sha la ka ri katkum ka Foreigners Act shwa u snem 2005, la ong une u heh sorkar.
La ïakren ïa ki mat pynroi jong ka Kendrapara katba u Myntrei Rangbah u dang shim jingkheiñ ïa ka jingtreikam ha ka liang ka synshar khadar, ka jingroi jong ki jingtei, bad ki jingthmu na ka bynta ka imlang-sahlang.
“Ka Kendrapada kan long ka jaka plie ïa ka jingthmu pynroi jong ka sorkar jylla ha u snem ba ar,” la ong u Majhi, haba kren sha ki heh sorkar bad ki nongmihkhmat paidbah.
Ha kane ka jingïalang bishar bniah la wan ban ïashim bynta da ki MLA na ka distrik bad la pynlong ïa ki jingiïkren halor ka jingpynkhlaiñ ïa ki jingtei jong ki marpoh khyndew, ban pynsted ïa ka jingroi jong ki karkhana, bad ban pynïar ïa ka jaka ba pawnam jong ka distrik.
U Majhi u la kyrpad ïa ki heh sorkar ban pynleit jingmut ha ki kam halor ki kam jngohkai pyrthei jong ka Kendrapara bad ban buh ïa ki jingpyrshang ban khring shuh shuh ïa ki nongjngohkai pyrthei sha ka Bhitarkanika National Park bad Gahirmatha Marine Sanctuary katba dang pynneh pynsah ïa ka jinglong jingman jong ka mariang.
Kumjuh ruh ki MLA bad kiwei kiwei ki nongmihkhmat paidbah ki la khring ïa ka jingmut jong u Myntri Rangbah ka jylla halor ka jingdawa kaba la slem bha ban buh ïa ka kolej ai jingsumar ha Kendrapada bad ban pyntreikam ïa ka projek ‘parikrama’ sawdong jong ka Baladevjew Temple.
U Majhi u la pynpaw ka jingsngewnguh bad ai ka jingïaroh ïa ka jinglah pyntreikam jong ka distrik ha ka ban wanrah ïa ka Lakhpati Didis bad ka jingjop jong ka Subhadra Yojana.
U la ïaroh ruh ïa ka jingtreikam jong ka distrik ha ka jingpynbeit ïa ki jingeh, ka jingpyntreikam ïa ka skhim bam shiteng sngi, bad ka jingsam ïa ki jingai jingïarap.
U la kyrpad ïa ka bor synshar ban pynkhreh ïa ka Roadmap kaba bniah hapoh shibnai ban kyntiew ïa ka Kendrapada kum ka distrik kaba long ka nuksa, da kaba pynleit jingmut kyrpang ha ka jingroi jong ki karkhana, ka kam jngohkai pyrthei, ka bording ba lah ban pynthymmai, bad ka um dih bad ka jingsumar kaba khlem jingthut.
Shwa kane, u Majhi u la ïashim bynta ha ka Tiranga Yatra naduh ka Temple Mausi Maa haduh ka Temple Shri Baladev Jew kaba pawnam bha.
U la pynpaw ruh ïa ki ar tylli ki jingthmu ïaid paidbah kata ka Krishi Rath bad ka Revenue Rath.
