Kolkata, Jylliew:
Haba ka West Bengal ka la paw ba ka la don ha ka kyrdan kaba lai jong ka jingdon kiba pang Covid ha India hadien ka Kerala bad Gujarat, ka Myntri Rangbah ka Mamata Banerjee ka la pynlong ïa ka jingïalang ha ka Lah Sngi U Blei ryngkat ki heh sorkar bad ki riew shemphang ban shim jingkheiñ ïa ki jingpynkhreh ha ka jylla.
“Ngi la pynlong ïa ka jingïalang mynta ka sngi khnang ba ngin lah ban long kiba la pynkhreh. Ki heh ophisar na ki tnad bapher bapher ki la ïashim bynta ha ka jingïalang ryngkat bad ki riew shemphang ha kane ka liang. Ngi kyrmen ba kan ym don shuh ka khlam. Ngi donkam ban long kiba husiar. Hynrei kam donkam ban tieng,” ong ka Banerjee ha ki lad pathai khubor ha ka ïing treikam jong ka jylla hadien ka jingïalang.
Ki don haduh 747 ngut ki nongpang Covid kiba dang dang shitom mynta ha ka jylla haduh ka step jong ka lah sngi U Blei.
Ki la don kumba 54 ngut ki nongpang tang ha ki 24 kynta ba ladep. Katba ka Kerala, ka don 1,957 ngut ki briew kiba dang shah ktah ha ka jingpang, ha Gujarat, ki don 980 ngut.
Ki don 6,491 ngut kiba dang shah ktah ha ka jingpang Covid ha India haduh ka step jong ka lah sngi U Blei.
La don uwei u briew uba la ïap na kane ka jingpang ha Kolkata.
Ki doktor kiba la don lang ha kane ka jingïalang ha State Secretariat ki la ong ba une u khñiang jingpang uba dang ktah ïa ki briew, mynta u dei shi bynta jong u Omicron.
