Guwahati, Jylliew:
U Myntri Rangbah barim jong ka jylla Bihar, u Lalu Prasad Yadav, u la rakhe ïa ka sngikha kaba 78 snem ha ka ïingsah jong u ha Patna, ha ka sngi Balang. Une u riewpawkhmat uba long ruh u heh nongïalam jong ka Rashtriya Janata Dal (RJD) u la ot ïa u Cake uba khia 78 kilo ba la shna baroh da ki Laddoos da ka waitlam, katba ki nongbud jong ka seng ki la ïalum ban pynsngew ïa ka jingkitbok bad ka jingkhublei jong ki.
Ka durkhih ba la ring ka la pyni ba ïa u Yadav la ïarap da ki nongbud jong u katba u dang ot ïa u cake uba heh bha ha kaba kane ka la saphriang sted ha ki Social Media. Kine baroh ki la pyrta da ka kyntien “Lalu Yadav Zindabad” ha kaba ka la sawa jam.
U nongïalam jong ka seng Congress u Rahul Gandhi, u la ai khublei kyrpang ïa u Yadav, ha ka sngi kha jong u. Ha ka jingphah khubor ha ka rynsan X, u Gandhi u la batai ïa ka jingïadei jong ki kum kaba la ïaid shabar ka saiñ pyrthei.
U khun rangbah jong u Yadav, u Tej Pratap Yadav, uba la shah beh seng na ka bynta hynriew snem, u la ai ruh ïa ka jingkhublei sngi kha ïa u kpa jong u. U la sam ïa ka dur jong u, uba kdup ïa ka dur ba la dro jong u Lalu Yadav, kaba la dro ha kawei ka kynroh.
