Chennai, Jylliew:
Ka sorkar Tamil Nadu hapoh ka jingïalam jong u Myntri Rangbah u MK Stalin, ka la pyntreikam pyrkhing ha kaba ïadei bad ka jingdie duma hajan ki skul kiba don ha kylleng ki jaka jong ka jylla.
Kane ka jingpyntreikam pyrkhing, ka la long hadien ba la ïoh ban kurup ïa 4.1lak kilo u duna ha ka taïew ba la lah ha kaba la pyntreikam ruh ïa ki kyndon ha kaba la daiñ kuna ruh ïa ki nongpynkheiñ aiñ.
Ha kaba ïadei bad kane, ki la don bun tylli ki dukan kiba la shah khang namar ka jingdie beaiñ ïa ki duma bam bad ki duma dih bad ki jait jingbam myllen kiba ktah ïa ka koit ka khiah ha palat hynriew bnai ba la leit ha Madurai distrik, ki nongshong shnong bad kumjuh ki Councillor, ki la pynpaw ba ki sngewïahap ha kaba ïadei bad ka jingpyntreikam ba la wanrah da ka Food Safety Department ha Dindigul.
Kumba la buh jingkheiñ da ki heh ba dei khmih, la ong ba ki la don palat 3,200 kilograms ki duma ba la khang ban die ba la ïoh ban kurup hapdeng u bnai Naiwieng 2023 bad u Jylliew, 2024, bad haduh T. 1.30 klur la ïoh ban lum kum ka jingdaiñ kuna.
Kiba bun na ki jaka die ïa kine ki jait jingbam bad jingdih ki die ha ki dukan kiba rit, kane ka la pynshem shitom ha ka ban lap ïa ki da ki pulit bad ki heh jong ka Food Safety Department.
Shuh shuh la ïathuh ba ka jingïohnong na kaba die beaiñ ïa ki duma bam bad dih ki long lai shah haba ïanujor bad ki jingbam kiba dei bam bam, kum ki soh bad kiwei pat, ha kaba kane ka la pynlong ïa kiba bun ba kin die ïa kum kine ki jingbam bad ki jingdih kiba lah ban pynïoh kamai kaba heh na ka jingïohnong haba die ïa ki.
