New Delhi, Jylliew:
Kum ka jingpynthikna ïa ka jingïoh thied tiket lyngba kaba shu Online hapoh ka bhah na ka bynta ki tiket Tatkal, ka tnad Rel ka la pynbna ha ka sngi Balang ba tang ki briew kiba la shah ithuh lyngba u Aadhaar kin lah ban thied tiket Tatkal ha ka website jong ka IRCTC bad ka app jong ka, ka ban sdang naduh ka 1 tarik, Naitung, mynta u snem.
Ka tnat Railways ka la rai ruh ban ym shah ban buh agent ha ki 30 minit hadien ba la plie ïa ki jingbuhTatkal na ka bynta baroh ar kata jong ka AC klas bad ki bym dei ki AC klas. Kane ka dei ka sienjam kaba nyngkong kaba la shim hadien ka jingïamir jingmut kaba bniah hapdeng ki riew shemphang bad u Myntri ka tnat Railway u Ashwini Vaishnaw, kaba la bishar bniah dalade ïa ka rukom treikam shwa ban mynjur ïa ki jingkylla.
Kum ka jingpyntikna ïa kane ka rai, uwei u heh jong ka tnad Railway u la ong ba ki jingpynkylla ïa ka rukom thied tiket Tatkal ki long ban pynbha ïa ka jingpynshisha ïa ki nongpyndonkam bad ban tehlakam ïa ka jingpyndonkam bakla da ki agent ba thok.
Kane ka tnad ka la batai ïa ka rukom treikam ka bathymmai: “Ka jingpynshisha ïa ka OTP katkum ka Aadhaar kan long kaba donkam na ka bynta ki jingpynrung kyrteng na ka bynta ka Tatkal ba la leh online naduh ka 15 tarik, Naitung, jong une u snem.”
Ka la ong, “Ïa ki tiket Tatkal yn lah ban thied lyngba ki kor kompiwtor PRS (Passenger Reservation System) jong ki Indian Railways/ki agent ba la ai bor tang hadien ba la pynshisha ïa ka System-Generated OTP, kaba la dei ban phah lyngba ka Systam ha ka Mobile Number ba la pynbiang da ki nongpyndonkam ha ka por ba ki thied tiket”.
