Srinagar, Jylliew:
Ka bor synshar shnong ka la buh ka jingtyrwa ban shna 5,200 tylli ki jaka rieh hapoh khyndew ha ki bynta jong ka Uri bad Karnah ha ka thaiñ ba shaphang Shatei jong ka Kashmir na ka bynta ka jingshngaiñ jong ki nongshong shnong ha ka bynta khappud, kiba im hapoh ka jingap jingma na ka jingbthei jong ki nar bad ki suloi kiba ïaid sha shiliang pud da ka Pakistan. Katkum ka jingong ki heh sorkar, yn sdang ban tei mardor hadien ba la mynjur na ka sorkar.
Kine ki ar tylli ki thaiñ ki la mad ïa ka jingeh na ka jingshah siat bom jong ka Pakistan ha ka por bad hadien jong ka Operation Sindoor ha u bnai ba la leit. Ki la don palat 700 tylli ki ïing bad ki jingtei ki la shah pynjulor. Palat 60 tylli ki jingtei, kynthup ïa ki ïing ki sem jong ki briew, ki la shah pynpra, katba saw tylli ki skul shi bynta ki la shah pynjulor.
Uwei u heh sorkar u la ong ba ka bor synshar shnong ka la tyrwa sha ka sorkar J&K ban buh 4 hajar tylli ki jaka rieh hapoh khyndew ha ka thaiñ Uri. “Ngi la tyrwa 3,500 tylli ki jaka rieh shimet shimet, kiba lah ban buh 10-120 ngut ki briew bad 500 tylli ki jaka rieh paidbah kiba lah ban buh 30-40 ngut ha ka shisien buh”, la ong u heh sorkar.
