New Delhi, Jylliew:
Kum ka jingther pyrshah ïa ka sorkar NDA ba la ïalam da u Narendra Modi ha ka sorkar pdeng kaba la kynjoh da 11 snem, u President ka Congress u Mallikarjun Kharge ha ka sngi Balang u la kynthoh ïa u Myntri Rangbahduh ba u la leh ïa ki 33 tylli ki jingbakla ha kane ka por.
Ha ka jingïakren bad ki nongthoh khubor hangne, u Kharge u la kyrpad ïa u Myntri Rangbahduh ka ri ba un pynpaw katno tylli ki jingkular u la ai ha ka por elekshon bad katno tylli na ki u la lah shisha ban pynurlong.
“Ka la long 11 snem bad la jia 33 tylli ki jingbakla. Phi la tip bad nga la ju kren ïa kata ha Parliament ruh – ngam pat ju ïohi ïa u Myntri Rangbahduh uba thok haduh katne, uba leh bun ki jingbakla, uba khum ïa ki briew, uba thok ïa ki samla, uba pynngop ïa kiba duk bad uba khwan ban ïoh vote. Nga la don ha ka bor synshar na ka bynta ki 55 snem bad ha ki kam saiñ pyrthei da 65 snem. Ym pat ju don kiba kum ma u, la ong u Kharge.
Haba kren sha ki nongthoh khubor hangne, u la ong ba u Myntri Rangbah u la thok na ka bynta baroh bad um pyntreikam ïa kano kano kaba u kren, bad haba kylli um don jubab ei ei na ka bynta kata.
“Ka jingleh jong u Modi ka long kaba be-aiñ, kaba khlem ïahap bad ka synshar paidbah, bad um kwah wat ban ai ïa ka kam sha u Symbud lamphang sha ka liang pyrshah. Ka pyni ba um don jingngeit satia ha ka synshar paidbah,” u la bynrap.
U la ong shuh shuh ba ka UPA bunsien ka ju ïaroh ïa ki kam babha ba la leh da ka sorkar u Vajpayee, hynrei ha ka jingïapher, ka sorkar NDA ka la kynthoh beit ïa ka UPA ba la ïalam da ka Congress bad ka la pynsangeh noh ïa kiba bun ki jingthmu ba la sdang ha ka por jong u Manmohan Singh.
