Ahmedabad, Jylliew:
U Myntri Rangbahduh ka ri, u Narendra Modi, u la poi ha Ahmedabad, ha ka sngi Thohdieng bad u la jngoh ïa ka jaka, kaba la jia ka jinghap jong ka liengsuiñ Air India Boeing 787-8 Dreamliner, kaba la shim ïa ka jingim jong ki 241ngut ki briew, ha ka shisngi ba la jia ka jingjia, kaba dei kawei na ki jingjia ba shyrkhei tam ba la jia ha kine ki por ba dang shen.
U Myntri Rangbahduh ka ri u la poi ha ka kad liengsuiñ Sardar Vallabhbhai Patel bad u la leit beit beit sha ka jaka ba hap ka liengsuiñ ha ka thaiñ Meghaninagar, ong ki heh sorkar.
La synran ïa u da u Myntri Rangbah ka Gujarat u Bhupendra Patel.
U Modi, uba la shakri kum u Myntri Rangbah ka Gujarat la 12 snem, kham mynshwa, u la ong ba u la “lyngngoh” ïa kane ka jingjia ba sngewsih.
“Ka long kaba pynsngewsih palat ha kaba ym don kyntien shuh ban ong. Ha kane ka kynta kaba sngewsih, ki jingpyrkhat jong nga ki don bad baroh kiba shah ktah ha ka. La ïakynduh bad ki Myntri bad ki bor synshar kiba trei ban ïarap ïa kito kiba shah ktah,” u la ong ha ka rynsan X ha ka sngi Palei.
Ha ka sngi Palei u Myntri ka sorkar kmie jong ka tnat ki kam pohïing u Amit Shah bad u Myntri ka Civil Aviation u Ram Mohan Naidu Kinjarapu ki la hiar sha katei ka jaka ban shim jingkheiñ ïa ka jinglong jingman.
Ka sorkar kmie ka la thaw ïa ka komiti bahakhliehduh ban tohkit ïa katei ka jinghap liengsuiñ, la ong u Kinjarapu.
Kumba la ïoh khubor, la ong ba la don tang uwei u briew-u dei u trai ri India uba shong ha Britain u la lait im na kane ka jinghap liengsuiñ kaba la jia hadien ba ka AI 171 ka la kiew ban leit sha London Gatwick na ka kad liengsuiñ Sardar Vallabhbhai Patel International Airport na Ahmedabad.
Ki heh sorkar, ki ïathuh ba katei ka liengsuiñ, kam shym la lah shuh ban kiew ha ka por kumba 1.30 nohphai sngi, hashwa ba kan hap ha ki jaka sah jong ki doktor jong ka BJ Medical College ha ka thaiñ Meghaninagar bad ka la bthei, ha kaba la ïohi ïa ka jinglynguh jong ka tdem ïong kaba rben.
U Pilot u la ai ïa ka ‘Mayday’, Distress Call kaba pynpaw ba ka don ka jingma ba la hap ban ai jingïarap kaba kyrkieh, mar ïasdang kiew sha suiñ, hynrei ha kane ka por ym shym ïoh ïakren ei ei shuh, la ïathuh ka Air Traffic Control ha Ahmedabad.
Ha kaba ïadei bad kane ka jingjia ki riew shemphang ha ka liang ka liengsuiñ ki la ong ba lada ïaid katkum ki dur kiba don, ka jingbym don ka bor ha baroh ar tylli ki Engine bad ka jingshah tynrah jong u sim ka lah ban long napdeng ki daw kiba lah ban long.
Kumba la ïathuh la ong ba la ïohi ba la sei ïa ki metïap bad kiba la mynsaw kiba la ing, ha kaba ïa kine la pynkit sha City Civil Hospital kaba don marjan.
