Chennai, Jylliew:
U President jong ka seng ka Makkal Needhi Maiam (MNM) u Kamal Haasan bad lai ngut ki kyrtong ba la pynïeng da ka seng DMK kaba bat ïa ka jingsynshar, bad arngut ki kyrtong ba la pynïeng da ka liangpyrshah ka AIADMK la rai ha ka sngi Palei ba ki la shah jied khlem don ba ïakhun pyrshah sha Rajya Sabha na Tamil Nadu.
U Returning Officer u B Subramaniyam u la aiti ïa ki syrnod ilekshon sha ki 6 ngut ki kyrtong ha ka janmiet jong ka sngi Palei, namar ba ka por ban weng kyrteng ka la kut noh.
Ki la don baroh kumba 13 tylli ki jingpynrung kyrteng na ka bynta ki 6 tylli ki shuki Rajya Sabha kiba lait na ka jylla Tamil Nadu.
Hadien ba la bishar bniah, la kyntait ïa ki kot buh kyrteng jong ki hynñiew ngut ki kyrtong shimet namar ba kim shym la pyndep ne bud ïa ki kyndon ba la buh.
Ïa ki kot thoh kyrteng kiba biang la pdiang ha kaba kine ki kynthup ïa kajong u Kamal Haasan, ki kyrtong jong ka DMK u P Wilson, u Rajathi, ba la tip ruh da ka kyrteng kum u Salma, bad u S R Sivalingam, kumjuh ruh ki kyrtong jong ka AIADMK u I S Inbadurai bad u M Dhanapal.
Da ka jingdon jong ki kyrteng kiba biang kiba ïadei bad ka jingdon jong ki jaka ba lait, la pynbna ba ki hynriew ngut ki kyrtong ki la shah jied khlem don ba ïaleh pyrshah, ha kaba kane ka la pynlong ba ym donkam shuh ban don ka jingthep vote.
Hadien ba ki la ïoh pdiang ïa ki syrnod, u Wilson, ka Salma bad u Sivalingam ki la leit jngoh ïa ka jingtep jong u C.N. Annadurai bad u M Karunanidhi bad ki la leh burom.
Kumjuh ruh ki MP ka AIADMK ki la ai burom da kaba buh da ki syntiew ha ki dur jong u MG Ramachandran bad ka J Jayalalithaa ha ophis treikam ka seng jong ki.
