New Delhi, Jylliew:
Ka kynhun National Investigation Agency (NIA) ha ka sngi Saitjaiñ ka la pynlong ïa ka jingkhynra ha Madhya Pradesh bad Rajasthan kum shi bynta ban tohkit ïa ka buit pyntriem jong ka kynhun lehnoh ba la shah ñiew beaiñ ka Hizb-ut-Tahrir (HuT), kaba la kynnoh ba ka don ka jingthmu ban pynshitrhem ïa ki samla Muslim, ong ki heh sorkar.
Ka kynhun ka la pynlong ïa ka jingkhynra ha ki lai tylli ki jaka ha Bhopal bad ar tylli ha Jhalawar, Rajasthan, ha kaba ïadei bad ka jingtohkit kaba dang ïaid shakhmat halor ki kam jong ka HuT bad ka kynhun jong ki nongbud jong ka.
Ki jingkhynra ki dei shi bynta jong ka mukotduma ba la ujor da ka kynhun NIA kum shi bynta jong ka jingpyrshang jong ka ban pynduh pyndam ïa ki kynhun lehnoh bad ki kynhun lehnoh bapher bapher kiba pyrshang ban pynphriang ïa ka jingkulmar ha kylleng ka ri India, kaba ïadei bad ka jingthmu jong ka HuT ban pynlong lehnoh bad pynrung kam ïa ki samla Muslim kiba rit paid, ong ka kyrwoh ba la pynmih da ka tnad tohkit.
“Ki samla ki la shah ai mynsiem ban pynsaphriang ïa ki kam thombor ha ka jingthmu ban pynkhyllem ïa ka sorkar India kaba la jied da ka synshar paidbah bad ban seng ïa ka ri Islamic State kaba synshar da ka aiñ Shariah,” la ong ka khubor.
Ki kynhun jong ka NIA ki la kurup ïa ki tiar Digital ha ka por ba ki khynra, ïa kiba yn sa phah ban leh ïa ka jingkhmih bniah, ong ka kyrwoh.
