Vijayawada, Jylliew:
U Myntri Rangbah jong ka jylla, N Chandrababu Naidu u la ïakynduh ïa u Myntri ka sorkar pdeng uba dei khmih ïa ka Commerce and Industry u Piyush Goyal ha ka Sngi U Blei, bad ïakren halor ki mat ba kongsan kiba ktah ïa ki nongrep bad ki nongshalan shabar ri jong ka jylla. Ka jingïalang ka la kren halor ka jingthied ïa u duma, ka khajna ban wanrah ïa ka umphniang soh slatlai, ka jingshalan ïa ki dohum shabar ri, bad ka GST halor ka um sohpieng, ha kaba u Naidu u pan jingïarap na ka sorkar pdeng ban kyrshan ïa ka ïoh ka kot jong ka rep ka riang jong ka Andhra Pradesh.
U Myntri Rangbah ka jylla u la pan kyrpang T.150 klur na ka Tobacco Board ban pynsuk ïa ka jingthied duma, da kaba kdew ba ka jylla ka pynlut T.300 klur ban thied 20 million kilo u duma HD Burley namar ka jinghiar dor jong ki ïew ki hat.
U la kyntu ïa ka Tobacco Board ban bei shiteng na kane ka jingpynlut ban pynjem ïa ka jingkit jingbah ha ka liang ka pisa jong ka jylla, bad ban kyrshan ïa ki nongrep duma.
U Naidu u la pynpaw ba hynñiew tylli ki jaka thied duma la buh ha ki distrik Bapatla, Guntur, Palnadu bad Prakasam ban pynsuk ïa ka jingthied duma. U la tyrwa ruh ban pynkylla ïa ki aiñ ban pynbeit ïa ka jingpynmih duma, bad ban pynïaid ïew lyngba ka Tobacco Board.
U Myntri Rangbah ka jylla u la pynpaw ïa ka jingsngewkhia halor ka jingbuh khajna 10% ïa ka umphniang soh slatlai, kaba la pynhiar ïa ka dor, bad ktah jur ïa ki nongrep sla tlai jong ka Andhra Pradesh.
U la kyntu ïa u Goyal ban pyrkhat biang ïa kane ka rai, da kaba pynksan ïa ka jingïaleh jong ka bad ki thong jong ka National Mission halor ki umphniang bam, bad ka jingktah kaba sniew jong ka ïa ka ïoh ka kot jong ki nongrep.
U Naidu u la kren ruh halor ka khajna kaba 27% ba la buh da ka ri America halor ka jingshalan dohkha shabar ri, kaba la ktah haduh 8 lak ngut ki nongri dohkha ha ka jylla. U la kyrpad ïa u Goyal ban sdang ïa ka jingïakren bad ka US ban pynhiar ïa kine ki dor bad ban pynlait ïa ka kam ri dohkha.
Shuh shuh, u Naidu u la pan jingpynhiar ïa ka GST halor ka soh sohjew na ka 12% sha ka 5%, ka mat kaba u la dep ban ïakren bad u Myntri ka tnat pla tyngka ka sorkar pdeng. Kane ka jingpynhiar kan ai jingmyntoi ïa ki nongrep sohpieng bad ki nongpynkhreh ha AP, la ong u Naidu.
U Goyal u la jubab bha ïa ka jingkyrpad jong u Naidu. Yn shim ïa ki sienjam ban ïada ïa ka jingmyntoi jong ki nongrep duma, soh slatlai bad sohpieng jong ka Andhra Pradesh, la ong u Goyal.
Kane ka jingïalang ka pyni ïa ka jingpyrshang jong u Naidu ban ïoh ïa ka jingkyrshan jong ka sorkar pdeng na ka bynta ka rep ka riang bad ka jingshalan mar shabar ri jong ka Andhra Pradesh, da kaba thmu ban ïada ïa ki nongrep, bad ban kyntiew ïa ka roi ka par jong ka jylla. Hadien kata, u Naidu u la ai khublei ïa u Goyal.
Ha ka jingthoh ba la buh ha ka rynsan X, u Goyal, u la ong ba u la don ka jingïakynduh bad ka jingïamir jingmut bad u Naidu. “Ngi la don ka jingïakren kaba bniah halor ki jingthmu pynroi kiba bun jait ha ka jylla, da kaba pynleit jingmut kyrpang ha ka jingroi jong ki karkhana.
La pynthikna ïa ka sorkar Andhra Pradesh ïa ka jingkyrshan ba pura jong ngi namar ba ka ïalam ïa ka jingkylla ha ka jingim jong ki briew ha ka Jylla,” ong u Myntri ka sorkar pdeng.
