Ahmedabad, Jylliew:
Lai sngi hadien ka jinghap kaba shyrkhei jong ka liengsuiñ Air India shabar jong ka kad liengsuiñ jong ka Ahmedabad kaba la pynlong ïa palat 270 ngut ki briew ban ïap, ki bor pynïaid haduh mynta ki la ithuh ïa ki 80 tylli ki metïap, kynthup ïa u Myntri Rangbah barim ka jylla u Vijay Rupani, lyngba ka Test DNA, bad aiti ïa ki metïap jong ki 33 ngut.
Haba ai ïa ka jingpynbna kaba thikna, u State Emergency Commissioner u Alok Pandey u la ïathuh ba la dep ban ai haduh 33 tylli ki syrnot ïap bad la aiti ïa ki met ïap sha ki longïing jong ki. Ban kyrshan ïa ki longiing kiba sngewsih, la phah 22 tylli ki kynhun ba kyrpang ban ïarap ïa ki ban pyndep ïa ki jingdawa Insurance bad ban lait na ka jingeh ha ka liang ka pisa tyngka.
U la ong ba la pynlong ïa ka jingïadei bad ki bahaïing jong baroh 230 ngut ki nongleit nongwan, bad kiba ha ïing-ha sem jong ki lai ngut ki bar jylla kiba dang sah la khmih lynti ba kin poi hapoh ki 36 kynta ban wan.
Haba pynthikna ïa ka jingïaid shaphrang halor ki jingithuh ïa ki briew, u Civil Hospital Assistant Superintendent u Dr Rajnish Patel u la ong, “La pynthikna ïa ki DNA ba ïadei na ka bynta ki 80 ngut kiba la khlad haduh mynta, bad la ïakynduh ruh ïa ki bahaïing-hasem. Na kine, 33 tylli ki met ïap la aiti noh sha ki bahaïing-hasem.” Kitei kiba la shah pynïap ha kaba la aiti ïa ki metïap jong ki, ki dei na Ahmedabad, Vadodara, Kheda, Botad bad kiwei kiwei ki jaka.
Kum si bynta ban ïarap ïa ki bahaïing-ha sem kiba la duh noh ïa kiba la khlad noh, ka sorkar jylla ka la buh ïa ki kynhun ai jingkyrshan ba kyrpang na ka bynta uwei pa uwei uba la khlad noh. Kine ki kynhun kiba don lai ngut ki dkhot-kiba kynthup ïa u ophisar ba rangbah jong ka tnad synshar, u heh pulit, bad u nongai jingmut ba la pyntbit-ki ïatreilang bad ki longïing, ki ai jingkyrshan ha ka jingsngew, ka jingpynbiang, bad ka rukom treikam.
“Naduh ka por 9 baje hynnin ka miet haduh ka por 1 baje janmiet, ki kynhun jong ngi ki la trei borbah ban pynïadei ïa ki nongmuna DNA,” la ong u Myntri ka tnat ki kam pohïing ka jylla ka Gujarat u Harsh Rameshbhai Sanghavi ha ki lad pathai khubor.
Namar ba bun na ki met ïap ki la shah thang haduh bym lah ban ithuh ne shah pynjulor lym kumta, ki bor pynïaid ki dang pynlong ïa ka DNA test ban pynthikna ïa ka jinglong jong kiba la ïap ha kane ka jingjia ba shyrkhei.
Na ka jingïoh ïa ka jingtip kaba thymmai ha ka jingïakren bad ki nongthoh khubor, u Dr Rajneesh Patel u la ong ba ïa ka rukom ithuh la pynïaid da ka jingsngewkhia kaba khraw bad kaba thikna bha katkum ka jingstad saïan. “Ka jingaiti ïa ki metïap ka long tang hadien ba la pynthikna ïa ka DNA khnang ban lait na kano kano ka jingbakla,” u la ban jur.
Baroh lait noh tang uwei na ki 242 ngut ki briew kiba don ha ka liengsuiñ, kynthup ïa ki nongtrei bad ki nongleit nongwan ki la ïap nalor ym duna ïa ka 29 ngut ki briew kiba don ha madan namar ka liengsuiñ Air India AI171- ka Boeing 787-8 Dreamliner kaba dang leit sha London Gatwick, ka la ngam shyntur tang katto katne minit hadien ba ka la kiew bad ka la hap ha ka jaka sah jong ki samla pule jong ka BJ Mebohogar College hajan ka BJ Meboani College.
Hapdeng ki jingpyrshang bajur ban ai jingïarap, ka kynhun ba ha khlieh duh na ka ophis jong u Myntri Rangbahduh ka la poi ha Ahmedabad ha ka Sngi U Blei ban peit ïa ka jingïarap kaba dang ïaid shakhmat.
Kane ka kynhun, kaba la ïalam da u Principal Secretary jong u Myntri Rangbah, u Dr PK Mishra, kan sah ha Gujarat na ka bynta ar sngi lynter ban buddien ïa ki kam pynlait im, ai jingïarap, bad ka jingtohkit. Ki jingïalang ba kongsan la pynbeit ryntih bad u Myntri Rangbah jong ka Gujarat, u Bhupendra Patel, u DGP, bad u Additional Chief Secretary (Home).
Hadien ba u la leit jngoh ïa ka jaka ba la hap ka liengsuin, u PK Mishra u la pynpaw ia ka jingsngewsih bad ka jingiatylli. “Ngi la wan shane ban sakhi hi dalade ïa kiei kiei baroh, bad ka long kaba sngewsih shibun. Ha ka jingshisha ym donkam ban kren bun, baroh ki la tip lypa. Baroh ki sngewsih, bad ym don ei ei shuh ban kylli. Hynrei ngi la sngap ïa baroh, bad ngi la pynpaw ïa ka jingsngew bad jingïatylli jong ngi bad ki,” u la ong.
Ha kajuh ka por, ka Air India ka la ong ba ka dang ïatreilang bad kiwei pat ki kompeni Tata Group na ka bynta baroh ki jingïarap kiba lah ban ai sha ki bahaïing-hasem jong kiba la ngat ha ka jingshah tynrah liengsuiñ.
Ban ïarap ïa kiba haïing-hasem kiba la duh noh ïa kiba la khlad noh, ka sorkar jylla ka la buh ïa ki kynhun ai jingkyrshan ba kyrpang na ka bynta uwei pa uwei uba la khlad noh. Kine ki kynhun kiba don lai ngut ki dkhot-kiba kynthup ïa u heh ophisar jong ka bor synshar, u heh pulit bad u nongai jingmut ba la pyntbit-ki ïatreilang bad ki longïing, ki ai jingkyrshan ha ka jingsngew, ka jingpynbiang, bad ka jingkyrshan katkum ka buit treikam.
