Srinagar, Jylliew:
Ka president ka PDP, ka Mehbooba Mufti, ha ka Lah Sngi U Blei, ka la kyntu ïa ka tnad Ministry of External Affairs (MEA) ban shim mardor ïa ka sienjam khnang ban pyntikna ïa ka jingwan phai suk jong ki khynnah pule India kiba dang sahkut ha Iran ha kum kane ka por ba don hapdeng ka jingïakynad kaba jur kiba sahkut ha Iran, ki lah ban wanphai biang da kaba suk, hapdeng ka jingïakynad kaba dang ïaid shakhmat hapdeng ka Tehran bad Tel Aviv.
“Ki bahaïing jong ki khynnah pule kiba sahkut ha Iran ki nang sngewkhia mynsiem katba nang mih ki sngi. Nga kyntu jur ïa ka tnad Ministry of External Affairs ba kan shim ïa ka jingtuklar bad ki sienjam ban pyntikna ha ka ban lah ban pynphai suk ïa kiba ïeid bathoiñ jong ki,” la thoh ka Mufti ha ka rynsan X.
Ki la don da ki spah ngut ki samla pule Kashmir, kiba la pynrung kyrteng ha ki skulbah bapher bapher na ka bynta ki jingpule ban pyntbit ha Iran, ki sahkut mynta namar ka jingjur jong ka jingïakynad bad ka Israel.
Ki bahaïing jong ki samla pule ki la kyrpad ïa u Myntri Rangbahduh ka ri u Narendra Modi ban shim ïa ki lad ki lynti na ka bynta ban pynkynriah ïa ki da kaba suk, kum ka jingtrei shitom jong ka sorkar ha ka por ba don ka thma Russia bad Ukraine.
“Lada ki samla pule India ki la shah pynkynriah na Ukraine tang hapoh ki khyndiat sngi ha ka por thma, balei ba ki khun jong ngi kim shah pyllait im na Iran? Ki dei ruh ki nongshong shnong jong ka India,” la pynpaw iwei na ki kmie ki kpa jong kine ki khynnah pulit.
Ka Iran, ka la sdang biang ïa ka jinghiar thma thymmai da ki namding, ïa ka Israel, ha ka step jong ka lah sngi U Blei, kaba la pynmih ïa ki sur jingsawa jong ki liengsuiñ, ha kylleng ka ri.
Ki tnad treikam ba kyrkieh ki la pyntip ba ym duna ïa ka san ngut ki la ïap bad da ki phew ngut kiwei pat ki la mynsaw ha ka sngi kaba saw jong ka thma ba paw pyrthei hapdeng ki nongshun jong ka thaiñ, khlem kano kano ka dak jong ka jingpynhiar ïa ka jingeh.
Kane ka jingshah thombor kaba khatduh ka dei hadien ka taïew ba kut jong ka jingïakynad kaba la nang jur hapdeng ka Israel bad ka Iran, kaba la pynjur ïa ka jingtieng ïa ka jingïakynad kaba kham heh bad kaba kham shyrkhei ha ka thaiñ.
