Hyderabad, Jylliew:
Kum shi bynta ban pynpaw ba ka jingthmu ban kyntiew ïa ki kyrdan ha ki skul sorkar bad ban pynthikna ba uwei pa uwei u khynnah skul un ïoh ïa ka jinghikai kaba bha, u Myntri Rangbah ka jylla u A Revanth Reddy u la ong ba yn seng 571 tylli ki skul thymmai ha kylleng ki jaka nongkyndong bad sor mynta u snem ka pule-puthi ha ki jaka ba don palat 20 ngut ki khynnah.
U Myntri Rangbah u la shim ïa kane ka rai ha ka jingïalang bishar bniah ïa ka tnad pule-puthi ha Integrated Command and Control Centre ha ka sngi Thohdieng.
Da kaba pynshai ba ka sorkar kan mang ïa ka pisa kaba donkam ban pynbiang ïa ki jingtei, ka jinghikai nonghikai bad kiwei kiwei ki jingdonkam ha kine ki skul, u la ong ba dei ban thaw ïa ka rukom treikam kaba khlaiñ ban pynthikna ïa ka jingpule kaba bha na ka bynta uwei pa uwei u khynnah skul uba pynrung kyrteng ha ki skul ba pynïaid da ka sorkar.
U Revanth u la ai jingmut ïa ki lad ki lynti ban pynbha ïa ka rukom hikai bad u la tyrwa ïa ki jingpynkylla ban kyntiew ym tang ïa ka jingnang ktien jong ki khynnah skul hynrei wat ïa ka jingpynroi ïa ka jingtbit jong ki. U la kdew ba ka jingpynrung ïa ki jinghikai pynroi ïa ka jingtbit ha ka kyrdan skul heh kan ïarap ïa ki samla pule ban bud ïa ki jingsngewtynnat jong ki ha ki kam kiba hadien habud.
U Myntri Rangbah u la bthah ïa ka tnad pule puthi ban ïatreilang bad ka tnad Municipal Administration ban buh ïa ki skul ha ki jaka ba la ithuh na ka bynta ki jingtei ha ka imlang-sahlang hapoh ka HMDA bad ki jingthmu jong ka Municipal.
U la khot ruh ban pynbeit ryntih ïa ki jaka pule bapher bapher kiba treikam haduh ka kyrdan Intermediate hapoh ki kyrdan bapher bapher kum ki SC, ST, BC bad ki rit paid, ban pynthikna ba kawei pa kawei ka skul kan pynneh ïa ka jingkhlaiñ jong ki khynnah skul kaba biang.
U Myntri Rangbah u la bynrap ba ki jingai jingmut kiba pynpaw ïa ka jingdonkam jong ka ïing ka sem bad ka imlang-sahlang kin pynrung ïa ka jingsngew kitkhlieh bad ïarap ïa ki khynnah ban san sha ki nongshong shnong kiba khlaiñ ha ka jingmut jingpyrkhat bad kiba don ka jingkitkhlieh.
Haba u la ïohi ba ki khynnah skul ki nang jied ïa ki skul ba sah namar ka jingdon ki jingbam kiba bha, ki Uniform bad ki kot pule, u Myntri Rangbah u la hukum ban leh ïa ka jingpule ban wad bniah ïa ka jinglah ban ai ïa ki lad ki lynti kiba kum kine sha ki nongpule sngi ha ki skul sorkar.
