Bhubaneswar, Jylliew:
U Myntri Rangbah jong ka Odisha u Mohan Charan Majhi ha ka Lah Sngi U Blei u la ong ba ka sorkar jong u ka la pynsuk ïa ki samla haduh 73,346 ngut tang ha ki 369 sngi naduh ba u la shimti ïa ka kam.
Haba kren ha ka ‘Nijukti Mela’, ha kaba la sam ïa ki shithi thung kam sha ki 964 ngut ki samla kiba dang shu shah thung kam, kiba bun ki dei ki enjiniar rit, u Majhi u la ong, “Ka sorkar jong ngi ka dang sah tang shisnem bad saw sngi. Ha kane ka por kaba lyngkot, ngi la thung kam haduh 73,346 ngut ki samla ha kaba 28,346 ngut ha ki tnat sorkar bad 45,000 ngut ha ki kompeni.”
Haba pynpaw ïa ka jingdonkam jong ki kam sorkar, u Majhi u la ong ba ma u bad ki Myntri jong u kim shym la lah ban bat ïa ki kam sorkar bad kumta ki la jied ïa kiwei pat ki kam kum ka kam saiñ pyrthei. Hynrei ki samla kiba dang shu shah thung thymmai ki long kiba donbok ban ïoh rung ha ka kam sorkar, u la ong.
“Ki briew ki don ka jingsngewtynnat ïa ki kam sorkar. Ïa kane la pyni shai ha ka phlim Hindi ‘Nayak’, ha kaba u kpa jong ka tyngshop u kyntait ban pynïapoikha ïa ka bad u nongthoh khubor bad u kyntu jur ban ïathoh bad u nongtrei sorkar. Kata ka pyni haduh katno ki briew ki kheiñ kor ïa ka jingshakri ha ki kam sorkar,” ong u Majhi ha ka jingïalang.
U Majhi u la bynrap, “Tang ar percent na ki nongshong shnong jong ka Odisha ki don ha ki kam sorkar. Dei na kata ka daw ba ngi dang shimkhia ban thaw kam ha ki kompeni.”
U la ong ba ka jylla ka la pyndep ïa ki jingbei tyngka kiba shongdor T.13 lak klur, kaba la khmih lynti ba kan pynmih 12.90 lak ki kam jong ki riew shimet.”Shisien ba la seng ïa kine ki karkhana, yn thaw ïa ki kam kiba bun na ka bynta ki samla jong ngi,” u la ban jur.
Na ki 964 ngut kiba la shah thung, 907 ngut ki dei ki engineer kiba dang hapoh, kiba, u la ong, “kin noh synñiang shibun sha ki jingtei bad ka jingroi.”U la pynpaw ka jingkyrmen ba ki samla kiba dang shu shah thung thymmai kin trei da ka jinglong hok bad ka jingaiti lut.
“Kynmaw beit, ki kam bad ki rai jong phi ha ka kyrdan sorkar ki dei ban pynpaw ïa ka jingmyntoi paidbah. Phi dei ki shakri jong ki paidbah,” u la ong ïa ki. U Majhi u la bynrap ba ka sorkar ka thmu ban thung 1.5 lak ngut ki samla ha ka kam sorkar ha kine ki san snem ban wan.
“Ki la don kumba 65,000 tylli ki kam kiba yn pyndap ha ka basdang jong ki ar snem. Haduh mynta, la pyndap haduh 28,346 tylli ki kam sorkar,” u la ong bad bynrap ba la pynkiew ïa ka rta ban ïoh kam sorkar na ka 32 snem sha ka 42 snem.
Ha kane ka sngi la donlang ruh u Myntri ka tnad Food Supplies and Consumer Welfare u KC Patra, u Myntri ba dei khmih ha ki kam ki jam u Prithivi Raj Harichandan, u Myntri ka tnat Housing and Urban Development u KC Mohapatra bad u Myntri ba dei khmih halor ka Panchayati Raj bad halor ka umbam-umdih u Rabi Narayan Nayak.
