Bengaluru, Jylliew:
U Myntri Rangbah ka Karnataka,u Siddaramaiah, ha ka sngi Ba-ar u la kynthoh jur ïa ka seng Bharatiya Janata Party (BJP) kaba la dawa ban phah hiar shuki noh ïa u, halor ka jingïaïuh para briew kaba la jia ha ka 4 tarik, Jylliew ha ka por ba la don ka jingkynhoi risa jong ka jingjop ka Royal Challengers Bengaluru (RCB) kaba la shim ïa ka jingim jong 11 ngut ki briew bad pynmynsaw ïa kiba bun kiwei pat.
Kum ka jingkynnoh pyrshah ïa ka seng BJP ba ka la leh kam saiñ pyrthei halor kane ka jingjia, u la kyrpad ïa ki nongïalam ka BJP ba kin phah hiar shuki ïa kito kiba donkti halor ka jingjia hap bad bthei ka liengsuiñ ha Ahmedabad, ka jingkhyllem jong ka jingkieng ïaid kjat ha Morbi ha Gujarat bad ka jingïaïuh para briew kaba la jia ha ka por ba don ka Kumbh Mela ha Uttar Pradesh.
“Hato ki Myntri Rangbah jong kito ki jylla kim dei ki jong ka seng BJP? Ym tang ba kim shym la hiar shuki, hynrei kito ki sorkar ruh kim shym la pynlong ïa ka jingtohkit kaba bniah halor kine ki jingjia,” u la ong.
Kum ka jingkyrshan ïa ka rukom pyntreikam jong ka sorkar jong u ha kaba ïadei bad ka jingjia jong ka jingïaïuh para briew, u la ong,”Kaei kaba la jia hajan ka Chinnaswamy Stadium ka dei ka jingjia kaba sngewsih. Kum ka sorkar kaba don ka jingkitkhlieh, ngi la shim ïa ka jingkitkhlieh halor kane ka jingjia.”
U la bynrap ruh da kaba ong ba ka sorkar jylla ka la pynshitom da kaba tyngeh pyrshah ïa u Police Commissioner jong ka nongbah Bengaluru, ïa u heh jong ka kynhun wadbniah jong ka jylla, bad u Political Secretary jong u Myntri Rangbah.
U la ong ba la thaw ïa ka komishon kaba don uwei u dkhot ba la ïalam da u nongbishar ba la shongthait u John Michael Cunha ban pynlong ïa ka jingtohkit kaba bniah.
Ki la don bun ngut ki nongïalam jong ka seng BJP kiba la shah kem ha ka step jong ka sngi Ba-ar ha Bengaluru ha ka por ba ki dang ïaid paidbah ban poi sha ka ïingsah jong u Myntri Rangbah hadien ba ki la pynlong ïa ka jingïakhih ha Freedom Park ban dawa hiar shuki ïa u Myntri Rangbah bad ïa u Symbud Myntri Rangbah u DK Shivakumar, la ong ki heh sorkar kiba don jingtip halor kane ka bynta.
U President ka seng BJP ha ka jylla u BY Vijayendra, u nongïalam ka liang pyrshah ha Parliament u R Ashok, u nongïalam ka liang pyrshah ha ka Council u Chalavadi Narayanaswamy, bad u Symbud Myntri Rangbah barim u CN Ashwath Narayan ki la long napdeng kito kiba la shahkem.
Ha kaba ïadei bad kane ka jingïakhih ba la pynlong da ki nongïalam ka BJP, u Siddaramaiah u la ong ba ka pynpaw ïa ka jingthmu ban leh kam saiñ pyrthei.
“Ka jingpynlong kam saiñ pyrthei ïa ka jingjia basngewsih kam long ka jingsngew kaba tang mynta jong ka BJP. Ka la rung ha ka DNA jong ki ban suh kum ki pukni haman ki jingjia jong ki jingïap, ki jingjia aksiden ne ki jingjia ïakynad,” u la ong.
U la pynpaw ïa kiba bun ki jingjia ha ka ri kiba la jia ha ka por ba synshar ka BJP ha kaba kim paw ba don ka jinghiar shuki hadien manba jia ki jingjia, kynthup ka jingjia kaba la jia ka thma paidbah ha Gujarat ha u snem 2002, ha kaba u la kdew ba u Myntri Rangbah ha katei ka por ha ka jylla u dei u Narendra Modi, une um shym la hiar shuki wat hapdeng ki jingai jingmut na u Myntri Rangbahduh ha katei ka por u Atal Bihari Vajpayee.
U la buh jingkylli ïa ka jingpynslem ban lap ïa ki nongleh kam sniew ha Pahalgam bad u la ong, “Ha u bnai Ïaïong mynta u snem, ha ka por ba jia ka kam thombor jong ki lehnoh ha Pahalgam, ha kaba ki la don kumba 26 ngut ki nong India kiba la duh noh ïala kajong ka jingim. Ka seng jong ngi kam shym la dawa ïa ka jinghiar shuki jong u Myntri Rangbahduh halor kane ka jingjia. Wat mynta ruh ym pat lah ban ithuh lut ïa ki nongleh ïa kane ka kam thombor. Hato kane kam dei ka jingbymlah leh ei ei jong ka sorkar pdeng?”
