New Delhi, Jylliew:
U Myntri ka tnat ki kam pohïing jong ka sorkar pdeng, u Amit Shah, ha ka jingleit jngoh jong u ïa ka Pachmarhi ha Madhya Pradesh, u la ai jingmut ïa ki nongïalam ka seng BJP ba kin kiar na kaba pynmih ïa ki jingkren ki bym don nongrim.
Haba kren sha ki MP bad MLA ha ka jaka ai jinghikai jong ka seng, u la ban jur ba watla ki jingbakla ki lah ban jia shisien, hynrei dei ban pynthikna ba kin ym jia biang. U la bynrap ruh ba “ka jingpynsangeh ha ka jingkren ka dei ka jinglong kaba kongsan tam” bad “ki jingbakla kim dei ban jia biang”.
Kane ka jingkren jong u Shah la ïohi ba ka dei ka khubor kaba shai ha ka jingïadei bad ki jingkren kiba la pynmih jingïakynad dang shen kiba la kren da u Myntri sorkar ka Madhya Pradesh u Vijay Shah bad u Symbud Myntri Rangbah u Jagdish Devda, kiba la wanrah ïa ka jingkynthoh kaba jur bad ka jingpynjah burom ïa ka BJP ha ka ri baroh kawei.
Ka jingai jinghikai jong ka BJP kaba lai sngi, ka dei kaba la pynlong naduh ka 14 tarik haduh ka 16 tarik, Jylliew ha ka jaka lum jong ka Pachmarhi, ka long ban hikai ïa ki nongmihkhmat ba la jied jong ka seng, halor ka jingïaid lynti jong ka BJP ha ka kam saiñ pyrthei, ka jingmut jingpyrkhat bad ka jinglah tehlakam ha ka seng. La sdang ïa ka camp da ka jingrwai ïa ka Vande Mataram, bud sa ka jingkren jong u Shah sha ki jingïalang.
Ki jingkren jong u Vijay Shah pyrshah ïa u Colonel Sofiya Qureshi, uba la don bynta ha ka Operation Sindoor, bad jong u Deputy Chief Minister u Jagdish Devda halor kumno ki shipai ki ‘dem’ ha ki sla kjat jong u Myntri Rangbahduh u Narendra Modi, ki la shah kynthoh.
U Amit Shah u la maham ïa ki nongïalam ba kin kiar na kaba kren halor ki mat kiba khia ne kiba don jingïakynad bad u la pynkynmaw ruh ba don napdeng jong ki kiba la dep leh kum kine ki jingbakla ha ki por ba la dep. U Shah u la bynrap ba ka jingbym don akor bad ka jingkren laplah ka pynsniewdur ïa u nongïalam bad ïa ka seng hi baroh kawei.
U Myntri ka sorkar pdeng u Bhupendra Singh ruh u la kren ha katei ka camp bad u la pynpaw ïa ka jingsngewkhia jong u Shah, da kaba ong ba ka kam jong u riewsaiñ pyrthei ka lah ban shah pynthut ha ki jingkren kiba pynkulmar lane ki jingleh bakla ki riewpaidbah.
U la ban jur ïa ka jingdonkam ban sngap jar ha ki mat bym donkam khnang ban ïada ïa baroh ar, kata ïa ki briew bad ïa ka kyrteng jong ka seng.
