New Delhi, Jylliew:
Ka jingïakhun ilekshon kaba nyngkong eh hadien ka jingjia jingthombor jong ki lehnoh ha Pahalgam bad ka jingdon jong ka Operation Sindoor, kaba dei ka ilekshon shiteng samoi sha phra tylli ki Assembly konstitwensi ha kylleng ka Punjab, West Bengal, Gujarat, bad Kerala ka la sdang ha ryngkat ka jingpynkhlaiñ ïa ka jingpahara jong ki pulit hynnin ka sngi.
Ka jingthep vote ka la sdang naduh ka por 7 baje mynstep haduh ka por 6 baje janmiet.
Ka jingthep vote ka la sdang hapdeng ki jingpynbeit ba pyrkhing bha ha ka liang ka jingpahara, kynthup ïa ka jingpynjari ïa ki bor pahara jong ka sorkar pdeng bad ki pulit, ryngkat bad ka jingbuddien beit ïa ka jingïaid lynti jong ka ilekshon shiteng samoi lyngba ka rukom pynbna paidbah kaba bniah bha ha ka web.
Kumba la pynbeit, la ong ba ka jingñiew ïa ki vote kan long ha ka 23 tarik, Jylliew.
Ka jingthep vote ha Ludhiana West konstitwensi ka la long na ka jingsah thylli noh hadien ba la khlad noh u MLA ka AAP u Gurpreet Bassi Gogi ha u bnai Kyllalyngkot.
La khmih lynti ba kane ka ilekshon shiteng samoi kan don ka jingïakhun kaba don bun ki bynta, ha kaba ki nongïakhun ba kongsan ha ka saiñ hima-sima ki kynthup kiba na ka seng Aam Aadmi Party (AAP), ka Congress, ka BJP, bad ka Shiromani Akali Dal.
Ki la don baroh 14 ngut ki kyrtong kiba ïalehkai bad ki don 1,75,469 ngut ki nongthep vote kiba lah ban pyndonkam ïa ka hok thep vote jong ki – 85,371 ngut na ki ki dei ki kynthei bad 10 ngut ki dei kiba don ïa ka jinglong kynthei bad shynrang.
Baroh ki don 194 tylli ki jaka thep vote na ka bynta kane ka ilekshon shiteng samoi bad ka jingpyni lyngba ka webcasting kaba 100 percent ïa ki jaka thep vote, la ïathuh ki heh sorkar.
Ka seng AAP kaba bat ïa ka jingsynshar ka la pynïeng kyrtong ïa u dkhot jong ka Rajya Sabbha u Sanjeev Arora na ka bynta kane ka ilekshon.
U Arora (61 snem) u dei u nongkhaïi uba sah ha Ludhiana bad la tip ruh ïa u kum u nongtrei ban ïarap ïa ka imlang-sahlang bad ka bhah ka miat jong ki paidbah.
Ka Congress, ka la buh ïa ka thong jong ka, ha u Bharat Bhushan Ashu (51 snem) Myntri barim ka Punjab, Working President ka Congress.
U Ashu u la long MLA la arsien na kane ka shuki ha u snem 2012 bad 2017. U la shah rem ha u Gogi da ka jingïapher kaba 7,512 vote ha ka ilekshon Assembly jong u snem 2022.
Ka seng BJP ka la pynïakhun ïa u nongïalam ba rangbah jong ka seng u Jiwan Gupta. U dei u dkhot jong ka Core Committee jong ka seng BJP ha Punjab.
U la neh hashwa kum u State General Secretary jong ka seng ha ka jylla. Ka SAD ka la jied ïa u Parupkar Singh Ghuman kum u kyrtong jong ka ha kane ka ilekshon shiteng samoi. U Ghuman u dei u nongïasaid aiñ bad u dei ruh u President barim jong ka Ludhiana Bar Association.
Ka ilekshon shiteng samoi na ka bynta ka Nilambur Assembly konstitwensi ha Kerala ka la long kaba donkam hadien ba u Anvar u la iehnoh ïa ka kam kum u MLA jong katei ka konstitwensi hadien ba u la pyndkut noh ïa ka jingïadei bad ka LDF ba la ïalam da ka CPI(M) halor ki katto katne ki jingkynnoh jong u pyrshah ïa u Myntri Rangbah ka jylla u Pinarayi Vijayan bad ki nongïarap bajan jong u. Napdeng kitei ki 10 ngut, ki nongïakhun ba kongsan ki long u M. Swaraj u nongsynshar LDF, u Aryadan Shoukath (UDF ba ïalam da ka Congress), u State Convener jong ka Trinamool Congress bad u kyrtong shimet u P V Anvar bad u Mohan George na ka kynhun NDA ba la ïalam da ka BJP.
Kumba la sakhi, la ong ba ki briew ki la sdang ban poi dang step hynnin ka sngi, ha ki 263 tylli ki jaka thep vote ha kylleng ka konstitwensi, kaba don palat 2.32 lak ngut ki nongthep vote ki ban jied ïa u nongmihkhmat jong ki napdeng ki 10 ngut ki kyrtong.
Ka thup nongthep vote ba khatduh ka kynthup ia 1,13,613 ngut ki shynrang, 1,18,760 ngut ki kynthei bad 8 ngut ki briew kiba don ïa ka jinglong kynthei bad shynrang, ha kaba 7,787 ngut ki dei ki nongthep vote ha ka sien kaba nyngkong eh, 373 ngut ki nongthep vote shabar ri, bad 324 ngut ki nongthep vote kiba shakri ïa ki paidbah.
Ka ilekshon shiteng samoi sha Kaliganj Assembly konstitwensi ha Nadia distrik ha West Bengal ka la long kaba donkam namar ka jingkhlad kyndit jong u MLA ka Trinamool Congress u Nasiruddin Ahamed ha u bnai Rymphang. Ka khun jong u ka Alifa ka dei ka kyrtong jong ka Trinamool Congress.
Ka BJP ka la pynïeng ïa u Ashis Ghosh kum u kyrtong jong ka, katba u kyrtong ka Congress u Kabil Uddin Shaikh u la ïoh ïa ka jingkyrshan jong ka CPI(M).
Ka ilekshon ha Visavadar bad Kadi Assembly Seat ha Gujarat ka la sdang naduh ka por 7 baje mynstep bad bteng haduh ka por 8 baje janmiet, ha kaba ka jingthep vote ka long ha ki 294 tylli ki jaka thep vote ha kawei pa kawei ka konstitwensi.
Baroh ar tylli ki seat, la buh ban ïakhun lai liang, namar ba ka BJP, ka Congress, bad ka Aam Aadmi Party (AAP), ki la pynïeng ïala kijong ki jong ki kyrtong.
Ka jaka shong jong ka Visavadar Assembly ha Junagadh distrik jong ka Gujarat, ka la sah thylli naduh u bnai Nohprah, 2023, hadien ka jingiehnoh kam jong u MLA ka AAP, u Bhupendra Bhayani, uba la leit pynïasoh noh hadien bad ka seng BJP kaba bat ïa ka jingsynshar.
Na ka bynta ka ilekshon shiteng samoi, ka BJP ka pyniïng ïa u Kirit Patel, katba ka Congress ka pynïeng ïa u Nitin Ranpariya.
U President barim jong ka AAP ha Gujarat, u Gopal Italia, u don ruh ha katei ka jingïakhun, ha kaba u buh ïa ka jingïakhun kaba lai liang.
Kaba kham paw ka long ba ka BJP kam shym la jop ïa ka shuki Visavadar naduh u snem 2007, hynrei ki nongïalam ka seng ki don ka jingkyrmen ban pynkut noh ïa ka jingkyrduh kaba la neh 18 snem.
Ha ka ilekshon sha ka ïingdorbar thawaiñ ka jylla ha u snem 2022, u Bhupendra Bhayani, u la pynliem ïa u Harshad Ribadiya ka BJP, uba don mynshwa bad ka seng Congress, da ka jingïapher kaba 7,063 vote.
Ka Kadi konstitwensi kaba don ha Mehsana distrik bad kaba la mang lypa na ka bynta ki kyrtong Scheduled Caste (SC), ka la thylli noh ha ka 4 tarik u Rymphang hadien ka jingkhlad noh jong u MLA ka BJP u Karsan Solanki.
Ka BJP ka la pynïeng ïa u Rajendra Chavda, katba ka Congress ka la pynrung da ka kyrteng jong u MLA barim u Ramesh Chavda, uba la jop ïa ka ilekshon ha kane ka konstitwensi ha u snem 2012 hynrei u la shahrem noh ha u Solanki ha u snem 2017.
Ka seng AAP ruh ka la ïakhun ha ka konstitwensi bad u Jagdish Chavda kum u kyrtong.
