Bhubaneswar, Jylliew:
Ka bor synshar jong ka Mayurbhanj kan sa pynshisha ïa ki kot ki sla jong kiba don licence suloi ha ka distrik.
Ïa kane ka rai ban pynlong ïa ka jingpynshisha la shim hadien ba la lap ba 16 tylli ki licence suloi la pynrung ha ka kyrteng jong ki briew kiba la khlad noh.
Ha kaba sdang jong une u bnai, ki pulit jong ka Bangiriposi ki la kem ïa uwei u nongap pahara barim jong ka bank halor ka jingkynnoh ba u la die beaiñ ïa ki tiar siat sha ki runar kiba treikam ha Similipal.
Ki tyllong khubor ki la ïathuh ba la kynnoh ba namar ka jingbym shimkhia ha ki jingpeit bniah jong ki tnad, ki nongbat licence ki pynkheiñ ïa ki kyndon kiba pyntreikam ïa ki suloi.
Hapoh ka jingpynbyrngia ban ïada ïalade, la pyndonkam bakla ruh ïa ki tiar siat na ka bynta ban tuh bad kiba bun ki kam runar.
Ki tyllong khubor ba thikna ki ïathuh ba ki don 583 ngut ki nongbat suloi kiba la ai licence hapoh ka jingpeit jong ki 31 tylli ki thanat pulit ha katei ka distrik.
Ki pulit ka Baripada Town Police Station ki don bun tam ki 103 ngut kiba ïoh Licence bad bud sa ka Bhanjpur (39), Jharpokharia (37), Karanjia (32), Udala (27), Rasgovindpur (24), Rairangpur Town (23), Tiring (22), Suliapada (20) bad Rairangpur Rural (19).
Ka Bangriposi, Badasahi bad Khunta ki don mar 17 ngut ki nongshim licence.
Kaba phylla ka long ba ym duna ïa ka 16 tylli ki suloi la pynrung kyrteng ha ka kyrteng jong ki briew kiba la khlad noh.
Nalor kata, palat 15 ngut ki briew, ki bym dei shuh ki nongshong shnong jong ka distrik, ki la ïoh licence suloi. Ki don ki jingkynnoh ba la ïathuh ba don kiba pyndonkam ïa ki tiar siat khlem da aiti ïa ki kuli ba donkam kum ka jingpynshisha.
Katkum ki kyndon ba la buh, u nongbat licence u lah ban thied haduh 100 tylli ki kuli ha ka shisnem bad u lah ban buh haduh 50 tylli ki kuli ha ka shisien buh.
Man la ka jingpyndonkam ïa ki tiar siat dei ban pyntip sha baroh ar ki thanat pulit jong ka thaiñ bad sha ka bor pynïaid distrik.
U Additional Magistrate District jong ka Mayurbhanj Iswar Chandra Nayak u la ong ba ka jingtohkit halor ki rukom ai licence ïa ki suloi ka la dep ban ïaid shakhmat.
Hadien kata yn sa pynlong ïa ka jingpynshisha ïa ki kot ki sla jong baroh ki nongbat ïa ki licence suloi ha ka distrik.
Ka jingpyntreikam mynta ka dang ïai bteng ban lap ïa ki briew kiba pyndonkam bakla ïa ki tiar siat bad kiba don ïa ki Licence.
Ha ka 3 tarik, Jylliew, ki pulit jong ka Bangriposi ki la kem ïa u Chittaranjan Giri, u nong-ap pahara barim jong ka bank bad ki la ïoh ban kurup ïa ki resit jong 954 tylli ki kuli ryngkat bad katto katne tylli ki kuli na ïing jong u.
Ka jingtohkit ba nyng-kong ka la lap ba u Giri u dei uba die kuli be-aiñ sha ki nongtuh.
