New Delhi, Jylliew:
Ka kynhun jong 110 ngut ki samla pule na India, kiba sahkut ha Iran bad kiba la shah pyllait im ha ka sngi Balang ki la hiar ha ka kad liengsuiñ jong ka Indira Gandhi International Airport jong ka nongbah Delhi.
Kiba bun na ki kata 90 ngut, ki dei na Jammu & Kashmir.
Kine ki samla pule ha kaba baroh ki dei na Urmia Medical University bad ka kynhun jong ki samla pule ba nyng-kong eh ban shah pyllait im, la pynkynriah lyngba ka Armenia bad Doha bad ki la kiew ha ka liengsuiñ ban leit sha Delhi ha ka miet jong ka sngi Balang. Ka liengsuiñ ka la shah pynslem da lai kynta.
Ïa mynta ka Iran, ka dang don hapdeng ka jingïaleh pyrshah bad ka Israel, bad ki bahaïing jong ki samla pule na India, ki la pan jingïarap da kaba tyngeh na ka sorkar.
Ki la don ki jingïakhih kiba jur halor kane ha Kashmir, kaba phah ïa ki samla pule kiba bun eh sha Iran.
Ki khubor ki ïathuh ba ki don palat ïa ka 13,000 ngut ki samla pule na India ha Iran bad kiba bun na ki, ki dang pule ïa ka kyrdan pule doktor.
Ha ka jingthoh ba la pyllait, ka Jammu and Kashmir Students’ Association ka la ai khublei ïa u Myntri Rangbahduh ka ri u Narendra Modi bad ïa u Myntri korbar ri u S Jaishankar halor ka jingpyrshang ban pynkynriah ïa ki briew ha ka por kaba biang.
Ka la ong ba ka kyrmen ba ïa kiwei pat yn sa pyllait noh shen bad kham kloi katba lah.
Baroh ki tiket liengsuiñ kynthup ïa kaba na Delhi sha Srinagar la pynbeit khlem jingsiew da ka sorkar pdeng, la ong ka kynhun jong ki samla pule ha ka jingthoh ba la buh ha ka rynsan X.
“Ngi sngewnguh shibun eh ïa kane ka jingpyrshang ban pynthikna ïa ka jingïaid lynti kaba suk, kaba pura sha ïing,” ka la bynrap.
Nalor ki samla pule, ki la don bun ruh ki nong India, kynthup ïa ki nongleit ïaid riewblei kiba la sahkut ha Iran.
Ha ka Sngi U Blei, ka tnad treikam jong ka India ha Tehran, ka la buh ïa ka phone ai jingïarap kaba kyrkieh bad ka la kyntu ïa ki nong India, ba kin phet mardor.
Ka jingïakynad hapdeng ka Iran bad ka Israel ka la nangjur shuh shuh naduh ba ka Tel Aviv ka la sdang ïa kaei kaba ka la khot ‘Operation Rising Lion’ pyrshah ïa ki jaka shna Nuclear jong ka Iran ha ka taïew ba la lah.
Ka Tehran ka la ai jubab da ka jingsiat ‘namding bad ka jingpynher ïa ki Drone kaba la ktah ïa bun tylli ki nongbah bad ki jaka sor ha Israel, ha kaba kane ka la pynïap ïa palat 20 ngut ki briew bad pynmynsaw ïa ki spah ngut.
Ha ka step jong ka sngi Balang, ki jet thma jong ki nong Israel ki la ther ïa ka Tehran hadien ba ki shipai jong ka ki la maham ïa ki riew paidbah ban mih noh na kawei ka distrik jong ka nongbah jong ka Iran.
Kham hadien, ha kane ka sngi, kaba long ka sngi kaba hynriew ba la sdang ka jingïapynibor, ka Israel ka la ong ban thombor ïa ka jaka pynmih Nuclear, katba ka Iran ka la ong ba kan siat da ki Hypersonic Missile.
U nongïalam bahakhlieh duh jong ka Iran, u Ayatollah Ali Khamenei, u la jubab ïa ka jingkhot aiti jong u President jong ka US, u Donald Trump, da kaba maham ba kano kano ka jinghiar thma jong ka US, kan don ïa ki jingma kiba shyrkhei, ki bym lah shuh ban pynbeit.
U President Trump u ban jur ba ka US kam shym la don bynta eiei ha ka jingpynbthei bom jong ka ri ba la ïatreilang jong ka Israel, hynrei u la maham ruh da kaba ong ba um don ka jinglah shah.
