Lucknow, Jylliew:
Katkum ka jingïathuh jong ki pulit, la ong ba ki la don kumba saw ngut ki khynnah kiba la ïap bad katto katne ngut kiwei pat ki la mynsaw ha ki ar tylli ki jingjia jong ka jingshah pom pyrthat kaba la jia ha Kaushambi distrik hynnin ka sngi.
Ha kaba ïadei bad ka jingjia kaba nyngkong, saw ngut ki khynnah ki la ïap na ka jingshah pom pyrthat katba ki dang leit sharai blang ha ka thaiñ Sarai Akil. Ki bahaïing ki la pynkit mar mar ïa ki sha ka jaka ai jingsumar jong ki riew shimet kaba don hajan, ha kaba arngut na ki ïa kiba la tip kyrteng kum u Satish (13) bad ka Mani (13) la pynbna ba ki la khlad noh. Ïa ki arngut kiwei pat la ai ka jingsumar kaba hashwa.
Ka jingjia kaba ar ka la jia ha ka shnong Tara Ka Pura, ha kaba kawei ka kynhun ki khynnah ka la rah ïa ki masi ban leit pynbam phlang. U pyrthat u la pom ïa ki ruh, ha kaba ka la shim ïa ka jingim jong u Govind (15) u la ïap hashen. Kawei pat ka khynnah kaba la tip kyrteng kum ka Rupa Devi (12) ka la khlad noh ha ka por ba shah sumar ha District Hospital.
Uwei pat u khynnah ïa uba la tip kyrteng kum u Mohit (10) u dang shah sumar ha kawei ka hospital shimet ha Sarai Akil, la ïathuh ki heh pulit.
