Shimla, Jylliew:
Ïa ka jingïarap jong ka sorkar pdeng kaba T.2,006.40 klur na ka bynta ka Himachal Pradesh ha kaba ïadei bad ki jingmaramot bad kiwei pat ki jingpynbha hadien ki jingshlei um kiba shyrkhei, ki jingtwa khyndew, bad ki jingjur slap ha u snem 2023 la mynjur da ka High-Level Committee, ba la khlieh da u Myntri ka sorkar kmie uba dei khmih ïa ka tnat ki kam pohïing u Amit Shah.
Ka kyrwoh ba thikna ka la pynpaw ba ka kynhun, kaba kynthup ïa ki Myntri ka pla tyngka bad ka rep ka riang jong ka sorkar pdeng bad u Vice-chairman jong ka NITI Aayog kum ki dkhot, ki la bishar bniah ïa ka jingtyrwa ban ai jingïarap pisa sha ka jylla na ka pisa hapoh ka jingtreikam jong ka National Disaster Response Fund (NDRF).
Kane ka jingthmu kan ïarap ban pynlong ïa ki kam pynbha bad tei pat, kiba mih namar ka jingjulor bad jingpynjot kaba la jia ha ka por Lyiur jong u snem 2023.
Na kane ka jingïarap, T.1,504.80 klur kan long ka bhah jong ka Centre na ka jingai pisa ban pynbha bha pat hapoh ka jingtreikam ka NDRF.Ha u bnai Naitung bad Nailar 2023, u slap uba jur u la wanrah ïa ka jingshlei um bad jingtwa khyndew ha ka jylla bad palat 550 ngut ki briew ki la ïap ha kane ka por.
Ka seng Congress ba la ïalam ïa ka sorkar ha Himachal Pradesh ka la ju kyrpad ïa ka sorkar pdeng ban pynkloi ban pyllait ïa ka pisa kaba T.9,042 klur hapoh Post-Disaster Needs Assessment (PDNA) na ka bynta u snem 2023-24.
Ha ka 12 tarik u Nohprah, 2023, ka tnat Ministry of Home Affairs ka la pdiang ïa ka jingïarap pisa kaba T.633.73 klur na ka NDRF na ka bynta ka Himachal Pradesh. U President jong ka seng BJP ha ka ri bad u Myntri ka tnat ka koit ka khiah jong ka sorkar pdeng u JP Nadda, uba dei na Himachal Pradesh, u la ong ba ka jingïarap pisa shuh ka long kaba donkam na ka bynta ban ai ka jingkyrshan ïa ki lanot kiba la ïakynduh jingeh na ki jingthombor jong ki bor ka mariang.
U nongïalam jong ka Liang Pyrshah ha Ïingdorbar ha ka jylla bad u Myntri Rangbah barim u Jairam Thakur, u president ka BJP ha ka jylla u Rajiv Bindal, Myntri barim ka sorkar pdeng u Anurag Thakur ki la pynpaw ka jingsngewnguh ïa ka sorkar pdeng halor kane ka bynta.
Ka sorkar pdeng ka la mynjur ïa ka jingthmu pyntreikam ïa ka T.1658.17 klur na ka bynta ka Uttarakhand hadien ka jingngam ka khyndew ha Joshimath bad T.555.27 klur na ka bynta ka Sikkim hadien ka jingjingjia jong ka Glacial Lake Outburst Flood (GLOF) ha u snem 2023.
