Chandigarh, Jylliew:
Da ka jingshahkem jong ar ngut ki briew kiba la shah kynnoh donkti ha ki kam syntiat kiba ïadei bad ka Inter-Services Intelligence (ISI) jong ka Pakistan ha ki Pulit jong ka Punjab ha ka 22 tarik u Jylliew, ki la don baroh 12 ngut ki briew kiba la shah kem ha ka jylla halor kum kine ki jingshah kynnoh haduh mynta.
U Director General of Police ka Punjab u Gaurav Yadav u la ong ba kine kiba la shah kynnoh ki dei kiba la tip kyrteng kum u Gurpreet Singh ba la tip ruh da ka kyrteng kum u Gopy Foji bad u Sahil Masih ba la tip ruh da ka kyrteng kum u Shali.
“Ha ka jingtohkit kaba ha shwa la pynpaw ba u Gurpreet Singh u la ïakynduh markhmat bad ki dkhot jong ka ISI jong ka Pakistan bad la suba ba u la ïasam ïa ki jingtip kiba khia bad kiba rieh lyngba ki Pen Drive. U nonglamkhmat jong ka ISI uba donkti ha kane ka kam la ithuh kum u Rana Javed,” ong u Yadav.
“La kurup ar tylli ki Mobile Phone ba la pyndonkam ban ïakren bad ki dkhoti jong ka ISI. Ka jingtohkit ka dang ïaid shakhmat ban lap ïa ka jingïadei kaba kham ïar jong ki nongsyntiat-ki kam pyntriem bad ban ithuh ïa baroh ki nongïatreilang.”
Ki tyllong khubor ki ïathuh ba ha ka thup jong ki briew kiba la shah kem ba ki dei ki ‘spy’ kiba la shah kem ki kynthup ïa u Gagandeep Singh na Mohalla Roudpur, u Tarn Taran uba la shah kem ha ka 3 tarik Jylliew bad u Jasbir Singh ba la tip ruh da ka kyrteng kum u Jaan Mahal na ka shnong Mahlan ha Ropar uba la shah kem ha ka 4 tarik, Jylliew.
La kynnoh ba u Jasbir u dei u nongiarap ba jan jong u YouTuber Jyoti Malhotra uba sah ha Haryana uba la shah kem ha ki pulit ka Haryana.Ka jingtohkit ka dang ïaid shakhmat ban pyntroiñ ïa katei ka kynhun kaba ïar jong ki nongsyntiat-ki kam pyntriem bad ban lap ïa baroh kiba ïatreilang.
Kham hashwa, kata ha ka 11tarik, Jymmang, ki Pulit jong ka Punjab, ki la kem ïa kawei ka longkmie kaba 31 snem ka rta kaba la tip kyrteng kum ka Guzala bad u paralok jong ka, u Yameen Mohammad, na Malerkotla, namar ba ki la shah kynnoh ba ki ïarap ïa uwei u heh sorkar jong ka Pakistan, uba don ha ka High Commission ha Delhi.
Ki pulit ki la ïathuh ba kitei ki arngut ki dei shi bynta jong ka kynhun wad bniah kaba kham heh kaba treikam ha katei ka thaiñ. Ha ka 12 tarik Jymmang, u Neeraj Kumar, uba dei u nongdie jingdie uba 28 snem ka rta na Pathankot, u la shah kem halor ka jingkynnoh ba u ai SIM card sha ki briew ki bym don bor da kaba pyndonkam da ki kot ki sla kiba thok.
Ha ka 13 tarik u Jymmang, u Raqeeb Khan uba na Roorkee ha Uttarakhand uba la trei kum u nongsuh jaiñ ha kawei ka dukan hapoh ka Bathinda Cantonment ha kine ki ar snem ba la dep, u la shah kem halor ka jingkynnoh ba u wan syntiat na ka bynta ka Ri ba marjan.
U Raqeeb u dei u riew paidbah uba ar uba don jingïadei bad ka kam syntiat na katei ka jaka, uba nyng-kong u dei u Sunil Kumar, u nongshna juti bad uba dei trai shnong na Samastipur, Bihar. La kem ïa u ha ka 29 tarik, Ïaïong.
