Iehnoh kam u heh ka Congress ha Gujarat ba shahrem ka seng ha ka ilekshon

Gandhinagar, Jylliew: 

U President ka Gujarat Congress, u Shaktisinh Gohil, ha ka Lah Sngi U Blei, u la iehnoh kam da kaba shim ïa ka jing-kitkhlieh kaba don akor halor ka jingshah rem ki kyrtong jong ka seng ha ki jingthep vote sha Kadi bad Visavadar Assembly konstitwensi.

U Gopal Italia, u nongïalam ka Aam Aadmi Party (AAP) u la jop ïa ka Visavadar Seat, katba u kyrtong ka BJP u Rajendra Chavda u la jop ïa ka Kadi (SC) konstitwensi.

Ka jingthep vote ka la long ha ka 19 tarik u Jylliew (sngi Palei) bad la ñiew ïa ki vote ha ka 23 tarik, Jylliew (Lah Sngi U Blei).

Kham hadien ba la pynbna ïa ki nongjop, u Gohil u la buh ïa ki kot ki sla jong u, da kaba ong ba ka jingmih jong ka ilekshon shiteng samoi ka long hapoh ka jingkhmih lynti jong ka Congress.

“Namar ba ka jingmih jong ka jingthep vote ha ka dorbar thawaiñ kam shym la long kumba ngi la khmih lynti, nga la shim ïa ka jingkitkhlieh kaba don akor na ka bynta ka jingshah rem jong ka seng jong nga bad nga la iehnoh ïa ka kam kum u President jong ka Gujarat Congress. Nga la phah Mail ïa ka shithi iehnoh kam sha u President ka seng ha ka ri u Mallikarjun Kharge,” ong u Gohil ha ka jingïalang bad ki nongthoh khubor.

Haduh ba ka seng kan thung ïa u heh nongïalam bathymmai jong ka GPCC, u MLA ba rangbah bad u General Secretary jong ka Gujarat Congress u Shailesh Parmar un treikam kum u In-charge president, la pyntip u Gohil.

Une u dkhot jong ka Rajya Sabha uba la 65 snem ka rta na Gujarat u la ban jur ba u lah ban ym shim ïa ka rai ban iehnohkam lada ka seng pyrshah ka la ïoh la kumno kumno kawei na ki ar tylli ki konstitwensi kiba la leit sha ka ilekshon shiteng samoi.

U Gohil u la shah thung kum u President jong ka jylla Congress ha u bnai, Jylliew, 2023 ha ka por ba dang ap ïa ka General Election jong u snem 2024.

U Italia, uba dei u President barim jong ka seng AAP na Gujarat, u la pynliem ïa u nongïaleh pyrshah ba jan tam jong u, u kyrtong ka BJP, u Kirit Patel, ha Visavadar ha Junagadh distrik,  da ka jingïapher kaba long 17,554 vote.

U kyrtong ka AAP u la ïoh 75,942 vote, bud sa u Kirit Patel (58,388), katba u kyrtong ka seng Congress u Nitin Ranpariya u wan ha ka kyrdan kaba lai da kaba ïoh tang 5,501 vote.

Ha ka shuki Kadi jong ka Mehsana distrik, kaba la buh kyrpang na ka bynta ki kyrtong Scheduled Caste, u Rajendra Chavda, u kyrtong ka BJP, u la mih kum u nongjop da ka jingïapher kaba 39,452 vote, halor u nongïakhun ba jan eh jong u, u Ramesh Chavda jong ka Congress.

Katba u Rajendra Chavda u la ïoh 99,742 vote, u MLA barim ka Congress u Ramesh Chavda u la lah ban ïoh 60,290 vote.