Bengaluru, Jylliew
U MLA jong ka seng Congress ha Karnataka na Kagwad, u Raju Kage, u la byrngem ban iehnoh kam, namar ka jingpynslem slem ban pyntreikam ïa ki kam pynroi ha ka konstitwensi jong u, ha kaba u la kynnoh ïa ka bor synshar jong ka jylla, namar ka jingbym leh eiei.
Haba kren ha Ainapur, Belagavi distrik, u Kage u la pynpaw ïa ka jingsngewsih ba ym shym la pynmih wat tang kawei ruh ka hukum treikam, hadien ar snem ba u Myntri Rangbah ka jylla u la mynjur ïa ka jingïarap kyrpang kaba T.25 klur.
Ka pisa ba la mang ka kynthup ïa ka 12 klur tyngka na ka bynta ban pynroi ïa ki surok bad 13 klur tyngka na ka bynta ban shna ïa ki 72 tylli ki Community Hall.
“Watla la ai jingtyrwa hynrei ym shym la mynjur wat tang kawei ruh ka Work Order, balei ka shim por ar snem tang ban sdang ïa ka kam?” u la kylli.
U Kage uba dei ruh u Chairman jong ka North Western Karnataka Road Transport Corporation (NWKRTC) u la ong ba u kyrshan pura ïa u para MLA ka Congress u Bah BR Patil.
“Ka jinglong jingman jong nga ka long kaba ïasyriem bha bad ka jong u BR Patil. Ngam thok ïa phi baroh. Nga kyrshan pura ïa ka jingkren jong u”, la ong u Kage.
Ha ka audio kaba la mih paidbah, u Patil u la ïakren bad u Sarfaraz Khan, u nongïarap shimet jong u Myntri ka tnat Housing, u Zameer Ahmed Khan, da kaba kynnoh ba ïa ki ïing hapoh ka skhim jong ka Rajiv Gandhi Housing Corporation la ai tang ïa kito kiba siew pisa tuh, katba ïa ki shithi jingai jingmut na ki nongmihkhmat ba la jied kum ma u la leh klet.
U MLA u la kynnoh ba ki mashin jong ka jylla ki la pulom pura bad u la ong ba u la duh jingkyrmen namar ka jingbym lah ban kiew shaphrang.
“Nga la duh jingkyrmen haduh katta katta ba nga dang pyrkhat wat ban iehnohkam. Wat sngewphylla lada nga leit ban aiti ïa ka jingiehnohkam jong nga sha u Myntri Rangbah ka jylla ha kine ki ar sngi ban wan,” u la maham.
Hynrei u Kage um shym la pynshai la u dang pyrkhat ban hiar shuki kum u MLA ne na ka kam NWKRTC jong u.
Haba jubab halor kane ka jingkynthoh, u Symbud Myntri Rangbah jong ka Karnataka u DK Shivakumar u la ong, “Nga la kren ïa kaei kaba nga don ban ong, ïa kaba sah, u Myntri Rangbah ka jylla uba dei ruh u Chairman ka Planning Commission un sa jubab.”
Haba kylli halor kitei ki jingkynnoh, u Shivakumar u la bynrap, “Ngam pat don jingtip halor kine ki jingkynnoh, ngan sa wad bniah bad sa jubab ïa phi hadien.”
U MLC ka Congress, u Nagaraj Yadav, u la kynthoh ïa baroh arngut, u BR Patil bad u Raju Kage, da kaba ong ba ka jingkren jong ki, ka long ka bym don jingkitkhlieh satia.
“U BR Patil u dei u nongïalam ba rangbah, u dei ban tip kumno ka system ka treikam, lada u ïohi ïa kano kano ka jingbym ryntih, u dei ban leit sha u Myntri ba dei peit ne sha ka Lokayukta, lada u Raju Kage u kwah ban bud ïa u, kata ka pyni ïa ka jinglong rangbah jong u”, u la ong.
“Ka Congress kam kyrshan ïa kane ka jingleh. Ka bor synshar bahakhlieh duh ka dang peitngor,” la bynrap shuh shuh u Yadav, da kaba pynpaw ïa ki jingshah pynshitom kiba lah ban mih.
U Chalavadi Narayanswamy, u nongïalam ka Liang Pyrshah ha ka Ïingdorbar thaw aiñ, u la ong, “Ha Karnataka, ka jingsynshar ka la pulom lut. Ka aiñ ka suk ka saiñ ka la hiar bad kam don kano kano ka roi ka par, tang ka jingbamsap. Lada phi kwah ba kano kano ka kam kan long mynta, phi hap ban siew ei ei. Lym kumta, kam jia eiei.”
U la bteng shuh shuh da kaba ong, “Ngi la maham naduh kaba sdang ba ka Congress kan pynkylla ïa ka Karnataka kum ka ATM jong ki lada ki wan ha ka bor synshar. Kata ka dei thik kaei kaba jia. Mynta, lada uno uno u MLA ne MLC ka Congress u kren ïa ka jingshisha, ki nongïalam ba bamsap ha la ka jong ka seng ki thombor ïa ki. Ki briew ki dei ban sngewthuh ïa kane, bad ha ka por ban wan, ka Congress kan sa wan biang.”
