Hyderabad, Jylliew
U Myntri khynnah ka tnat ki kam pohïing u Bandi Sanjay Kumar ha ka sngi U Blei u la kynnoh ba da ka jingtohkit bym ju kut jong u halor ki “jingbym ïaid beit” ha ka jingpyntreikam ïa ka skhim pyntuid um ka Kaleshwaram Lift, ka sorkar Revanth Reddy ka pyrshang ban ïada ïa ki heh nongïalam jong ka BRS.
Haba kren sha ki lad pathai khubor hangne, une u nongïalam ka BJP u la kam ba ka rukom tohkit ka ïaid ka pyni ba ka don ka jingïasngewthuh jingmut kaba rieh hapdeng ka Congress kaba synshar bad ka BRS.
Haba bat ïa ka kopi jong ka kaiphod jong ka National Dam Safety Authority halor ka Kaleshwaram, u la ong: “Da kaba kdew ïa ka jingbym don um, ka sorkar KCR ka la pynkynriah ïa ka KLIS na Tummidihatti sha Medigadda.
“Lada ka sorkar ka la ïaid shakhmat bad ka jingthmu tynrai, lah ban pyndep ïa kane ka projek ha Tummidihatti da ka pisa kaba T. 38,000 klur. Hynrei ki nongïalam ka BRS, na ka bynta ban pyndap ïa la ka jong ka pla, ki la pynheh ïa katei ka projek sha ka T. 1.2 lak klur”, u la kynnoh bad dawa ba ka sorkar u Revanth ka dei ban pynshisha ïa ka hok da kaba dawa ïa ka jingtohkkit jong ka kynhun CBI ha kaba ïadei bad ka kam bamsap.
“U Revanth Reddy mynta u leh kum ka stieh ïada ïa u KCR. Wat hapdeng baroh ki jingkynnoh bamsap bad ki mukotduma ba la buh pyrshah ïa u KCR hynrei ka sorkar u Revanth Reddy kam pat kem ïa u”, u la bynrap.
