New Delhi, Jylliew:
Kum ka jingpyntikna ba ka Operation Sindoor ka la pynpaw shai sha ka pyrthei ïa ka polisi ba pyrkhing jong ka India pyrshah ïa ki kam lehnoh, u Myntri Rangbahduh ka ri u Narendra Modi u la ong ha ka sngi Ba-ar ba ka sorkar jong u ka shim ïa kino kino ki sienjam kiba ïahap na ka bynta ka jingmyntoi jong ka ri.
Ki tiar ïaleh ba la shna ha India ki la pyni ïa ka jingktah jong ki ha ka por ba ïaleh bad ka Pakistan, u la ong, khlem da jer kyrteng ïa katei ka ri, ha ka jingïalang ban rakhe ïa ka jingdap shispah snem jong ka jingïakren hapdeng u ‘riew pawkhmat ba kynja mynsiem bad u nongpynkylla ïa ka imlang-sahlang, u Sree Narayana Guru bad u Mahatma Gandhi.
“Ngi la pyni ba ym don jaka rieh kaba shngaiñ na ka bynta ki lehnoh kiba pyntuid ïa ka snam jong ki nong India,” u la ong bad bynrap ba ka sorkar jong u ka la trei halor ki jingmut jong u briew uba donburom uba kwah ïa ka India kaba khlaiñ kaba lait na kano-kano ka jingshah lehbeiñ.
U Modi u la ong ba ka sorkar jong u ha kine ki 11 snem ba la dep ka la trei ban pynlong ïa ka India kaba khlaiñ ha ka imlang-sahlang, ka ïoh ka kot bad ka kam ïada ri. U la ong ba ka jingshaniah jong ka India ha ki ri nabar ban pyndap ïa ki jingdonkam ha ka kam ïada ri ka la nang hiar, bad ka la kylla long “aatmanirbhar” ha ka kam ïada ri.
Ki shipai India ki la pynlong ïa ki nongshun ban dem khrup da ki tiar ïaleh ba la shna ha India hapoh 22 minit, u la ong halor ki jinghiar thma ba thikna ha ki jaka lehnoh ha Pakistan bad ka Pakistan-occuped-Kashmir hadien ka jingshah pynïap ba shyrkhei jong ki ‘riew paidbah ha ki lehnoh ha Pahalgam.
U la ong ba u ngeit skhem ba ki tiar ïaleh ba la shna ha India kin sa pawnam ha kylleng ka pyrthei ha ki por ban wan.
U Myntri Rangbahduh u la kdew ïa ki skhim jingïarap jong ka sorkar jong u ha ka ïing ka sem, ka um dih bad ka koit ka khiah nalor kiwei pat ki bynta ban pynskhem ba kine ki la ai bor ïa ki bynta kiba shah iehnoh beiñ bad kiba sahdien ha ka imlang-sahlang.
