Hyderabad, Jylliew:
U Director General of Police ka Telangana (DGP) Dr Jitender ha ki khyndiat sngi jong ka taïew ba la lah, u la kyntu ïa ki samla pule ba kin long ki nongïaleh pyrshah ïa u drok bad pyntip sha ki pulit ïa kino-kino ki jingtip shaphang u drok.
“U drok u pynsniew ïa ki jingim da kaba pynsniew ïa ka koit ka khiah ha ka bor pyrkhat bad ka bor met. Uwei-pa-uwei na phi u dei ban pynphriang ia ka khubor ym duna ïa ka 10 ngut kiwei pat – ong em ïa u drok, hooid ïa ka koit ka khiah bad ka jingim kaba bha,” u la ong.
Ïa kane u la kren ha ka jingplie ïa ka Drug Awareness Week ha Telangana State Integrated Command and Control Centre (TGICCC) ha ka jingïadonlang kumba 2 hajar ngut ki khynnah skul na ki 15 tylli ki skul. Da kaba thmu ban pynsngewthuh ïa ki khynnah skul ïa ki jingma kiba lah ban mih na ka jingdih drok, la rakhe ïa ka Drug Awareness Week naduh ka 21 haduh 26 tarik u, Jylliew.
U Dr Jitender u la ong ba ka sorkar jylla ka thmu ban pynlong ïa ka Telangana ka jylla kaba lait na ki jingdih buaid bad ka jingbympdiang ïa ki kam ba pyrshah ïa la imlang-sahlang. “Baroh ngi dei ban ai ka jingkyrshan ïa ka sorkar bad ka Telangana Anti-Narcotics Bureau (TGANB) ha kane ka jingthmu,” u la bynrap.
Kum shi bynta jong kane ka jingthmu, yn pynlong ïa ki jingïalang pynsngewthuh paidbah, ki jingïalang, ki prokram pynsngewthuh paidbah, bad ki jingïalap hapdeng ki tnad ha kylleng ki skul, ki kolej, bad ki jaka ba don ki paidbah.
