New Delhi, Jylliew:
U Myntri ka tnat ïada ri u Rajnath Singh u la pynpaw biang ïa ka jingïengskhem jong ka India pyrshah ïa ki kam lehnoh ba ïaid lait ïa ki pud ha ka jingïalang Shanghai Cooperation Organisation (SCO) Defence Ministers’da kaba pynksan ba “ka jingsuk bad ka jingroi jingpar kim lah ban ïadon ryngkat bad ka kam lehnoh,” bad khot ban leh da kaba tyngeh pyrshah ïa ki lehnoh ba la kyrshan da ka sorkar.
U la kyntu ïa ki dkhot jong ka SCO ban ïatylli ha ka jingïaleh pyrshah ïa ki kam lehnoh ban pynthikna ïa ka jingshngaiñ bad jingshongsuk-shongsaiñ ha ka thaiñ.
“Ngi dei ban ïatylli ha ka jingïaleh pyrshah ïa ki kam lehnoh na ka bynta ka jingshngaiñ bad jingshngaiñlang jong ngi.”
Khlem da jer kyrteng ïa ki ri ba kyrpang, u Singh u la shim ïa ka thong ïa kito kiba pyndonkam ïa ka kam lehnoh kum ka atiar ba kongsan.
“Don ki ri kiba pyndonkam ïa ki kam lehnoh ba ïaid lait pud kum ka atiar jong ka polisi bad ki ai jaka rieh ïa ki lehnoh,” u la ong bad bynrap ba kum kane ka jingleh ka dei ban wan ryngkat bad ki jingma.
“Ka long kaba donkam eh ba kito kiba kyrshan, pynroi bad pyndonkam ïa ki kam lehnoh na ka bynta ki jingthmu kiba rit bad kiba sngewrit jong ki ki dei ban kit ïa ka jingma.”
Ha ka jingkdew ba la buhrieh shaphang ka Pakistan, u Singh u la pynpaw ïa ka jingshah thombor ha Pahalgam kaba dang shen, da kaba kdew ba ka jingpynïap ïa ka ka ïasyriem bha bad ki kam ba mynshwa ba la wanrah da ka kynhun lehnoh Lashkar-e-Taiba, ka kynhun lehnoh kaba don ha Pakistan.
“Ka jingthombor ha Pahalgam ka ïahap bad ki jingthombor ba la dep jong ka Lashkar-e-Taiba ha India,” u la ong, da kaba pynskhem ïa ka jingsngewkhia kaba la slem bha jong ka India halor ki kam lehnoh ba ïaid lyngba ïa u pud u sam.
U Singh u la khot ruh ïa ka rukom treikam bym ïahap jong ka pyrthei halor ki kam lehnoh: “Kam dei ban don ka jaka na ka bynta ki jinglong arliang mamla ha kaba ïakhun pyrshah ïa ki kam lehnoh. Ka SCO kam dei ban artatien ban kynthoh ïa ki jaitbynriew kiba pynleit jingmut ha kum kane ka jingleh arsap.”
U la pynskhem biang ïa ka jinglong ba khlem artatien jong ka India pyrshah ïa ki kam lehnoh, da kaba pynpaw ba ka India ka bud ïa ka polisi jong ka jingbym shah ïa ki kam lehnoh.
U la ban jur ïa ka jingdonkam kyrkieh ïa ka jingleh lang ha ka pyrthei, da kaba pynbna ba ka donkam ban pynngat ïa ki nongleh kam sniew, ki nongpynïaid, ki nongbei tyngka bad ki nongkyrshan ïa ki kam lehnoh kiba don ka jingkitkhlieh.
U Singh u la ban jur shuh shuh ba kino kino ki kam lehnoh ki dei ki kam runar bad ki bym lah ban pynshisha khlem da kheiñ ïa ka jingthmu jong ki, da kaba khot ïa ki ri ka pyrthei ban ïatylli ha kaba pynrem jur bad ïakhun pyrshah ïa ki kam pyntirem jong ki lehnoh ha baroh ki rukom jong ki.
