Shimla, Jylliew
Ka jingleit wad ïa ki 10 ngut kiba jah naduh ka jingjia shlei um kaba la mih na ka jingjur slap ha ki distrik kiba kynthup ha Kangra bad Kullu jong ka Himachal, la ïathuh ki heh sorkar ha ka sngi Palei.
Arngut ki briew ki la khlad noh katba kumba 20 ngut eiei la tharai ba kin shah rong noh ha ka um namar u slap uba jur ha ka janmiet jong ka sngi Balang hynrei naduh katei ka por la lah ban pyllait im ïa ki katto katne ngut ki briew kiba la jah.
Ha Manuni Khad ha Kangra distrik, ki la don kumba 15-20 ngut ki nongtrei kiba sah ha kawei ka Labour Colony hajan ka jaka shna um jong ka Indira Priyadarshini Hydroelectric la sheptieng ba kin shah rong noh hadien ka jingkiew ka um ha Manuni Khad jong ka Khaniyara.
Ïa ki lai ngut ki briew ha Rehla Bihal ha Kullu distrik kiba la shah rong ha ka umsaw ha ka por ba ki dang pyrshang ban rah ïa ki tiar ba kordor na ki ïing jong ki, ym pat lap bad ki dang jah rngai haduh mynta.
Ar tylli ki kynhun jong ki shipai State Disaster Response Force (SDRF) bad kawei ka kynhun jong ki nongap pahara ïing ki la don ha katei ka jaka bad la khot ruh ïa ki shipai National Disaster Response Force (NDRF) ban ïarap ban pynlait im, ong u Deputy Commissioner u Hemraj Bairwa hadien ba u la leit jngoh ïa katei ka jaka.
Ha ka jaka jong ka projek pynmih bording, la sheptieng ba hynriew ngut ki briew kin shah rong noh ha ka jingshlei um katba uwei u briew la ïohi ba u phet sha u lum uba don hajan ban pyllait im ïalade.
Ka jaka sah jong u ruh ym pat tip, la ong u DC. Kiwei pat ki la shah pyllait im da kaba suk, u la ong bad bynrap ba ka jingwad bad jingpyllait im ka dei ka kam kaba hashwa eh.
Ki kali jong ki nongjngohkai pyrthei kiba sahkut hapdeng ka jingshlei um hadien ka jinghap jong u slap ha ka them Manikaran, ha ka distrik Kullu, Himachal Pradesh, ha ka sngi Balang, 25 tarik u Jylliew, 2025.
Kawei ka longkmie ka la pynpaw ka jingsngewsih halor ka jingduh noh ïa ki dkhot ka longïing jong ka ïa kiba la pynshisha ba ki la shah rong ha ka um hajan ka thaiñ Bihari kaba don hapdeng ka jingshlei um, ha Kullu distrik, Himachal Pradesh, ha ka sngi Balang, 25 Jylliew, 2025.
Katto katne na ki briew kiba jah ki dei kiba wan na ki thaiñ Nurpur bad Chamba jong ka Himachal Pradesh bad kiwei pat na Uttar Pradesh. La phah ïa ka kynhun kaba aiti lut ban wad ïa u briew uba la leit sha ki lum ha ka por ba jur ka jingshlei um.
U MLA ka BJP ha Dharamshala u Sudhir Sharma uba la poi ha katei ka jaka ha ka sngi Palei u la ong ba katei ka jaka ba pyntreikam ïa ka projek ka jngai shi kilomitar na ka shnong jong u.
U la ïathuh ba u la ïoh phone ha ka sngi Balang ba ka um ka la kiew bad 15-20 ngut ki briew ki la shah rong noh.
U Sharma u la ong ba ka jingshna ïa ki ïingsah na ka bynta ki nongtrei hajan ka nala um, bad ka jingbym pynkynriah ïa ki haba ka jinglong ka suiñbneng ka long sha ki jaka bym shngaiñ ka dei ka jingbym shimkhia bad dei ban sdang ïa ka jingtohkit. U MLA u la dawa ruh ïa ka bai lutksan kaba biang sha ki bahaïing jong utei uba la khlad noh.
Katkum ka jingong jong ki heh sorkar, la pynsangeh noh ïa ka jingtrei jong ka projek namar u slap, bad ki nongtrei ki dang shongthait ha ki jaka rieh tngen ba shipor hajan katei ka jaka haba ka um kaba tuid na Manuni Khad bad ki nala um kiba don hajan ka la phai kylla sha ka jaka sah jong ki nongtrei, kaba la rong noh ïa ki katto katne ngut na ki.
Ha Kullu distrik, ka jingthwet ka dang ïaid shakhmat ban lap ïa lai ngut ki briew kiba la shah rong ha ka um ha ka por ba ki dang pyrshang ban rah ïa ki tiar ba kordor jong ki na ïing jong ki ha ka thaiñ Rehla Bihal jong ka Sainj.
Lai tylli ki jinghap slap la ïoh jingtip ba ka la long ha Jeeva Nallah bad Rehla Bihal ha Sainj bad Shilagarh ha ki thaiñ Gadsa jong ka distrik Kullu.
La ïathuh ruh ba ka jingshlei um na Manali bad Banjar ha ka distrik, bad ki jingkhynra ki dang iaid shakhmat.
