Bengaluru, Jylliew:
Na ka jingjur ka jingbym sngewhun hapoh ka jingsynshar jong ka Congress halor ka jingkynnoh ba ka pisa pynroi kam biang, u Myntri Rangbah ka jylla u Siddaramaiah ha ka sngi Balang u la pynbna ïa ka jingïarap mar T.50 klur na ka bynta kawei-pa-kawei ka konstitwensi Assembly, da kaba thmu ban pynjem ïa ka jingïakynad hapdeng ki MLA jong ka seng. La khmih lynti ba ïa ka pisa yn pyllait ha u bnai Naitung, bad la bthah ïa ki heh sorkar ban buh hakhmat eh ïa ki kam katkum ki jingai jingmut jong ki nongthaw aiñ, ong uwei u nongïalam uba tip bniah halor ki kam pynroi.
Kane ka sienjam ka long hadien ka jingkynthoh paidbah na ki heh nongïalam jong ka seng Congress, ba kynthup ïa u B. R. Patil, N.Y. Gopalakrishna, Belur Gopalakrishna bad u Raju Kage, kiba la pynpaw ïa ka jingpyntreikam ïa ki projek kiba suki, ka jingbym biang ka jingshimkhia jong ki bor synshar, bad ka jingbym lah ban pynroi ïa ki jingtei ha ki konstitwensi jong ki. Ban weng beit ïa kine ki jingeh, u Myntri Rangbah shen un sdang ïa ki jingïakynduh bam step man ka sngi bad ki kynhun barit jong ki MLA ban sngap ïa ki jingeh bad ban pynbeit ïa ki, la ong u nongïalam kumba la kdew haneng.
U Siddaramaiah ha ka janmiet sngi Balang u la ïakynduh ïa ki MLA ka Congress ki bym sngewhun u BR Patil bad u Raju Kage hadien ba u la wanphai na Delhi.
Katkum ka jingong jong ki heh sorkar, u Myntri ka tnat Housing u BZ Zameer Ahmed Khan ruh u la don lang ha katei ka jingïalang, hadien ka jingkynnoh jong u Patil.
U nongïalam ba la kdew haneng u la ong ba u symbud Myntri Rangbah u la bthah ïa baroh ki tnad ban leh kloi ïa ki jingkyrpad ba la buh da ki MLA khamtam eh ïa kiba ïadei bad ka roi ka par ha ka kyrdan konstitwensi, katba dang pynneh ïa ka jingbud ryntih ïa ka aiñ.
U Basavaraj Rayareddy, u nongai jingmut ha ka liang ka ïoh ka kot jong u Myntri Rangbah, u la kam ba ka jingpynslem ban pyntreikam ka la tynjuh ïa ka jingshaniah jong ki nongthaw aiñ hynrei u la kyntait ïa ka jingai jingmut jong ka jingleh pyrshah.
Haba kren ha New Delhi, u la ong: “U Siddaramaiah, uba bat ruh ïa ka tnad pla tyngka, u la pynskhem ïa ka jinglong jingman jong ka pla tyngka jong ka jylla ha kine ki ar snem ba la dep. U Rayareddy u la pynshong nongrim ïa ki jingeh kiba mynta ha ka jingbym biang jong ki polisi hapoh ka jingsynshar ba la ïalam da ka BJP kaba mynshuwa, kynthup ïa ka jingai kontrak ka bym ïaid beit bad ka jingpynmih pisa kaba sahteng.
U BR Patil dang shen u la kynnoh ïa ki heh sorkar ba ki pdiang pisa tuh ha ki projek shna ïing paidbah. Kane ka la pynmih ïa ka jingkynthoh kaba jur na ka Myntri ka RDPR bad IT/BT ka Priyank Kharge, kaba la ong ba u Patil u lah ban pynbeit ïa ki jingeh jong u bad ki nongïalam ba hakhliehduh ha ka jaka ban leit sha ki paidbah. “U Patil u dei u heh nongïalam bad nga burom ïa ka jingmut jingpyrkhat jong u, hynrei ïa kum kine ki mat dei ban ïakren hapoh”, u la ong. Haba ïadei bad ka phone kaba la mih ha kaba uwei u heh sorkar u la kyntait ïa ki jingkynnoh jong u Patil, u la bynrap, “Ka jingpyntreikam katkum ka aiñ kan bud lada don ki sakhi ba u la leh bakla.”
Haba ïada ïa ka jinglong jingman jong ka saiñ pyrthei jong ka jingai kam ha ki konstitwensi, ka Priyank ka la ong ba ka long kaba tynrai ïa ki nongshong shnong ba kin khmih lynti ïa ka jingïoh kam haba la seng ïa ki jaka treikam ba heh jong ka sorkar kum ka Jayadeva Institute of Cardiovascular Sciences ha ki thaiñ jong ki.
U MLA ka Kagwad, u Raju Kage, uwei pat u nongïalam uba la kynthoh ïa ka sorkar da kaba kdew ïa ka “jingsynshar kaba la hiar” bad ka jingbym don pisa bad ai dak ban iehnohkam namar ka jingpynslem ban pyntreikam ïa ki projek ha ka konstitwensi jong u. Haba jubab ïa kane, ka Priyank ka la kynthoh, “Man uwei pa uwei u MLA u khmih lynti ba kan ïoh pisa kham bun na ka bynta ka konstitwensi jong u – kaei kaba bakla ha kata?”
Ha kajuh ka por, u Myntri khynnah jong ka tnat ki kam pohïing u G Parameshwara u la ong ba u Myntri Rangbah un ïakren bad baroh ki nongthaw aiñ ki bym sngewhun. “Kine ki dei ki mat ba ïadei bad ki konstitwensi, ym dei ki jingbym ïasngewthuh jingmut ha ka kyrdan jylla, u Siddaramaiah un sa pynbeit ïa ki”, u la ong.
U Parameshwara u la pynpaw ba la dep bthah ïa ki MLA ba kin pynkhreh ïa ki plan treikam na ka bynta ki projek kiba shongdor T.50 klur ha ki bynta jong ki. “Wat ma nga ruh nga dang pynkhreh ïa kum kane ka plan. Hynrei kaei ka jingmyntoi lada ngim don pisa?” u la kylli. U la kubur ruh ia ki jingujor halor ki Myntri bym lah ban ïoh bad u la ong ba u Myntri Rangbah un shim ïa ki lad ki lynti ban pynbeit.
Haba kylli hato ki heh jong ka Congress ki la bthah ïa u Myntri Rangbah ban kren bad ki nongthaw aiñ ki bym sngewhun, u Parameshwara u la ong, “Ngam tip ïa kaei kaba la jia ha ka jingïalang ne hato la ai kum kine ki jingbthah.”
Haba kynthoh halor ka jingkynnoh ba ka duna ka pisa, u MLC ka BJP u CT Ravi ha ka sngi Balang u la dawa ban hiar shuki noh ïa u Myntri ka tnad Housing u Zameer Ahmed Khan, da kaba kynnoh ba ka don ka jingbamsap ha ka tnad jong u. “La ka long ka PA jong u ne ki heh jong ka tnad, u Zameer u dei ban shim ïa ka jingkitkhlieh. U dei ban risaiñ bad ïakynduh ïa ka jingtohkit. Hato u tieng ban leit sha patok?” U Ravi u la ong ha ka jingialang bad ki nongthoh khubor ha Mangaluru.
