Bengaluru, Jylliew
Ka Chief Secretary ka Shalini Rajneesh, ka la pynmih ïa ka Circular, kaba kyntu ïa baroh ki tnad sorkar ba kin pyndonkam ïa ka ktien Kannada ha kano-kano ka rukom ïakren. Kane ka Circular ka wan hadien ka jingbthah jong u Myntri Rangbah ka jylla Siddaramaiah ban pynphai ïa ki File ki bym don ha ka ktien Kannada sha ki heh ka tnad ba ïadei ban pan jingpynshai.
Ka Circular ka la ong ba wat hapdeng ka jingpynkynmaw bunsien, ki don ki heh ki bym phah ïa ki File bad ki shithi sha u Myntri Rangbah ha ka ktien Kannada.
Ka Circular ka kyrpad ïa ki heh sorkar ban ïakynduh ha ka ktien Kannada lait noh tang sha ka sorkar pdeng, kiwei pat ki jylla bad ki ïingbishar.
Wat ki kot ki sla ban thung kam, ban pynkynriah kam bad ban mynjur ïa ka shuti ki dei ban long ha ka ktien Kannada, lada ym lah yn leh pyrshah ïa u heh ba donkti, la ong ka Circular.
Katkum ka Karnataka State Language Act 1963, ka ktien Kannada ka dei ka ktien synshar jong ka Karnataka.
Ka CS ka la ong ba ki shithi kiba wan/ buh ha ki dorbar thaw aiñ, kiba khot ïa ka jingpyrkhat bad kiwei kiwei ki shithi ha ka por dorbar ki dei ban long ha ka ktien Kannada. Ki kot rung ki dei ban long ha ka ktien Kannada. “Ka jingïakren hapoh, ka jingpynbna, ka circular, ki hukum, ka jingkhot jingïalang bad kiwei kiwei ki rukom ïakynduh ki dei ban long ha ka ktien Kannada.
Hynrei ha ki katto katne ki khep, ïa kine ki jingbthah ym shym la bud,” ka la ong. Katkum ka Circular, ïa ka ktien Kannada la hap ban pyndonkam da uwei pa uwei u nongtrei uba trei ha ka sorkar, ka Corporation, ki Board, ki Local Urban Body, ki University, ki Aided Organization bad kiwei kiwei ki bor sorkar.
Ka CS ka la kdew ba ha ka jingïalang jong ka Karnataka Development Programme (KDP) kaba dang shen, u DC bad u heh ophisar ki la pyndonkam ïa ka ktien phareng ha ka jingïalang jong ki ban ïakren halor ki mat ba la buh, katba ki katto katne ki tnad ki pyndonkam ïa ka ktien phareng na ka bynta kiba ïadei bad ki kam bad ki DC ki mynjur ïa kajuh. Ïa kane la pyrshah da ka Kannada Development Authority.
