Vijayawada, Jylliew
U Myntri Rangbah ka jylla Andhra Pradesh u N Chandrababu Naidu u la pynlong ïa ka jingïalang bishar bniah kaba bniah ha ka ophis treikam jong u ha Amaravati ha ki khyndiat sngi jong ka taïew ba la lah ban bishar bniah ïa ka jingpyntreikam ïa ka polisi P4 (Public-Private-People-Partnership), kaba thmu ban pynduhjait ïa ka jingduk ha Andhra Pradesh.
Ka jingbishar bniah ka la pynleit jingmut ha ki bynta ba kongsan kum ka jingithuh ïa ki nongai jingmut, bad ka jingjied ïa ki longïing ba shah kynthup ha ki ‘Golden Families’ hapoh ka jingthmu pyntreikam ka P4.
Katkum ka jingïathuh jong ki heh sorkar, la ithuh haduh 19,15,771 tylli ki Golden Families ha kylleng ka jylla kum shi bynta jong ka P4 policy. Baroh ki long 87,395 tylli ki longïing kiba la dep ban shah pdiang da ki nongai jingmut.
U Naidu u la ban jur ïa ka jingdonkam ban pynkylla ïa ka P4 sha ka rynsan kaba pynïasoh ïa ki briew shimet kiba kwah ban ïarap ïa kiba duk bad ki longïing kiba donkam jingïarap.
U la bthah ïa ki heh sorkar ban pynjur ïa ka jingpyrshang ha kaba pynïadei ïa ki nonghikai bad ki Golden Families, bad ban buh ïa ki rukom ban ai ïa ki jingtip bad jingpynïaid kiba donkam sha ki nonghikai kiba kwah ban long ki nongai jingmut. Ban pynthikna ïa ka jingpeitngor kaba bteng, ka sorkar jylla ka la thaw ïa ka jaka khot kyrpang ban peit bniah ïa ka prokram.
U Naidu u la bthah ruh ïa ki heh sorkar ban pynlong ïa ki jingwad bniah ban bishar bniah ïa ka jinglong jingman jong ki Golden Families shwa bad hadien ba la jied ïa ki ban thew ïa ka jingkiew ha ka jinglong jingman jong ki.
Ban pynïar ïa ka jingïashim bynta jong ki nonghikai, u Naidu u la tyrwa ban pynïasoh ïa ki nongkhaïi, ki NRI, ki riew pawnam, bad ki heh spah lyngba ki prokram ba la thmu ban batai ïa ka jingmut jong ka P4, bad khot ïa ki ban shakri kum ki nongai jingmut.
U la pynbna ïa ki jingthmu ban leit hi dalade sha ki CEO, COO, CFO, MD bad ki Chairman jong ki 100 tylli ki kompeni ba pawnam ban pynshlur ïa ki ban ïashim bynta ha kane ka jingthmu.
Nalor kata, u Naidu u thmu ban pynlong ïa ki jingïalang bakongsan bad ki jaitbynriew Telugu ha India, bad shabar ri ban pynpaw ïa ka jingdonkam jong ka prokram, bad khot ïa ki ban ïadon bynta kum ki nonghikai. U la ai jingmut ruh ban thung ïa ki NRI kum ki nongai jingmut jong ka P4 ban kyntiew ïa ka jingïashim bynta jong ki. Ha kane ka jingïalang, u Naidu u la bishar bniah ïa ki katto katne ki Logo ba la shna ban kyntiew ïa ka jingthmu ban pynduh ïa ka jingduk, bad ka jingmut ka P4.
