Hyderabad, Jylliew:
Ki la don kumba 10 ngut ki nongtrei kiba la ïap bad katto-katne ngut kiwei pat ki la mynsaw na ka jingbthei bom kaba shyrkhei ha ka Sigachi Industries Pvt Ltd, kaba dei ka jaka shna dawai, kaba don ha Pashamylaram, Telangana, la ïathuh ka tyllong khubor ha ka step jong ka Lah Sngi U Blei. Ka jingbthei, kaba la jia ha ka por 9:30 mynstep, ka la pynmih ïa ka ding kaba jur bad ka la pynlong ïa ka jingtei jong ka karkhana ban twa, ha kaba kane ka la pynlong ïa kiba bun ki nongtrei ban sahkut hapoh ki jing-twa. Ki heh jong ka tnad pynlip ding, ki la pynthikna ba la lap ïa san tylli ki metïap na ki jingtwa haduh ba la thoh ïa ka khubor, katba ka jingpyrshang ka dang bteng ban wad ïa kiba dang lait im.
Ki bor pynïaid ki la ïoh ïa ka jingmaham kyrkieh halor ka jingpluh ding ha ka por 9:37 mynstep. Ha katei ka jaka la pynpoi haduh 11 tylli ki kali pynlip ding na ki station bapher-bapher kiba kynthup ïa ka Patancheru, Sangareddy, Kukatpally, Madhapur, Jeedimetla, bad Rajendranagar. Nalor kata, la pynbor ïa ki Robot pynlip ding, ki kynhun ba ïarap ïa ki jingjia ba sngewsih, bad ki kynhun pyllait im ba kyrpang ban treikam bad ban tem ïa ka ding kumjuh ban ïarap ha ka ban wad bniah.
Ka karkhana jong ka Sangareddy bad Pashamylaram ka la sakhi bunsien ïa kum kine ki jingjia aksiden ha kine ki snem ba la leit. Ha ka jingjia mynshwa ha kawei ka jaka shna dawai ha Sangareddy, ki la don 6 ngut ki nongtrei kiba la duh noh ïa la ka jingim bad 14 ngut ki la mynsaw. Sa kawei pat ka jingbthei bom ha Pashamylaram ha u snem 2023 ka la shim ïa ka jingim jong lai ngut ki nongtrei. U Myntri Rangbah ka jylla u A. Revanth Reddy u la pynpaw ïa ka jingsngewkhia kaba khraw halor kane ka jingjia ba sngewsih bad bthah ïa ki heh sorkar ba kin buh hakhmat eh ïa ki kam pyllait im bad ai jingïarap. “Shim ïa ki sienjam baroh ban pynlait im ïa kino-kino ki nongtrei kiba dang sahkut bad pynthikna ba kiba mynsaw kin ïoh ïa ka jingsumar kaba biang,” u la bthah.
Ka jingpyllait im ka dang ïaid shakhmat ha ka por ba la thoh ïa kane ka khubor, bad ki bor pynïaid kim pat pyntikna ïa ka jingkheiñ halor ka jingdon jong kiba la mynsaw.
