Bengaluru, Jylliew
U Myntri Rangbah ka Karnataka, u Siddaramaiah, ha ka Lah Sngi U Blei u la kyntait ïa ki khubor ba don ka jingbym ïahap jingmut hapdeng jong u bad u Symbud Myntri Rangbah ka jylla, u D.K.Shivakumar, kaba la ong ba kine ar ngut ki nongïalam ki la bteng ban ïajan ka jingïadei wat lada ka la don ka jingkhmih lynti ba kan don ka kynrum-kynram ha ki kam saiñ pyrthei.
Haba ïakren bad ki nongthoh khubor, u Siddaramaiah u la ong, “Ngi baroh ar ngut ngi don ha ka jingïadei kaba bha, kam pher wat lada don kiba ong kumno.” Kane ka jingkren jong u ka wan hapdeng ka jingkynthoh kaba dang ïai bteng halor ka jingbym ïasngewthuh jingmut hapoh ka seng Congress bad ka jingkynnoh ba ka seng ka lah ban kylla nongïalam ha ka jylla ha kaba kut jong une u snem.
Ha ka durkhih na ka jingïakren, lah ban ïohi ïa u D. K. Shivakumar ba u phuh samrkhie katba u Siddaramaiah u kner ïa la ka kti, u shim ïa la ka kti bad u rah ïa ka sha suiñ. Kane ka dak ka la paw kum ka jingpyni paidbah ïa ka jingïatylli kaba thmu ban pynduh ïa ka jingkynnoh shaphang ka jingïaleh hapdeng ki arngut ki nongïalam ba hakhliehduh.
U Myntri Rangbah ka jylla u la ong, “Nga ïasam ïa ka jingïadei kaba bha bad u (DK Shivakumar).Wat lada don kiba ong kumno kumno ruh, ka jingïadei hapdeng jong ngi ka dang skhem.”
Ka sorkar Congress ha Karnataka ka la mad ïa ki jingkylli kiba ïai bteng halor ka jingpynbeit ban ïasam ïa ka bor bad ka jingkylla nongïalam, ha kaba ki riew shemphang bapher bapher jong ka seng bad ki nongpeitkai saiñ hima sima ki la ai jingmut ba ka jingkylla ka lah ban don ha lynti. Hynrei baroh arngut ki nongïalam ki la kyntait beit ïa kano kano ka jingdon jingïapher.
Hapdeng ki dak kiba paw ba ki don ki jingkulmar hapoh ka Congress kaba synshar ha Karnataka, u General Secretary jong ka seng uba dei peit ïa ka jylla, u Randeep Singh Surjewala, u la poi sha Bengaluru ban pynlong ïa ka jingïalang bad ki nongthaw aiñ.
Ki jingïalang ki la don ha ka por ba katto katne ngut ki MLA ka Congress ki la pynpaw paidbah ïa ka jingsngewsih halor ka jingpynslem ïa ki kam pynroi bad ka jingmang pisa. Ka jingkynthoh ruh ka nang kiew halor ka jingkylla nongïalam kaba lah ban jia ha ka jylla ha kaba kut jong une u snem.
Haba ïada ïa ka jingwan jong u Surjewala, u Siddaramaiah u la ong, “u dei u nongpeit ïa ka Karnataka bad u General Secretary. U leh ïa la ka kam da kaba shim ïa ki jingai jingmut na ki MLA bad kylli lada ki don kino kino ki jingujor, kata ka dei ka kamram jong u. Ka seng BJP ka la long kaba tbit bha ha ka ban pynsaphriang ïa ki kam thok.”
Haba kynthoh halor ka jingleit jngoh jong u Surjewala, u Myntri jong ka tnat ki kam pohïing ka Karnataka u G Parameshwara u la ong, “U ju wan beit sha Karnataka ban ïalam ïa ngi halor kiba bun ki bynta. Ngam tip tikna balei ba u la wan jngoh ha kane ka por hynrei nga ngeit ba kine ki jingkren ki la long hadien kiba bun ki MLA ki la long ka daw ban kren ei ei sha ki.”
