Hyderabad, Naitung:
Ka jingïap jong ki briew na ka jingbthei kawei ka karkhana shna dawai ha Telangana, ka la kiew sha ka 44 ngut ha ka sngi Ba-ar haduh ba la thoh ïa ka khubor, namar ba la lap shuh shuh ïa ki met ïap, ha ka por ba ki dang pynlong ïa ka jingpyllait im. Ka jingïap kaba kham hashwa ka la kiew sha ka 34 ngut, la ïathuh ka lad phah khubor.
“La lap katto katne ki metïap hapoh ki jingtwa katba dang weng bad pynkhuid ïa ki. La lah ban sei haduh 31 tylli ki metïap na ki jingtwa katba lai ngut ki la ïap ha hospital katba ki dang shah sumar. Ka bynta ba khatduh jong ka jingpyllait im ka dang ïaid shakhmat,” la ong u heh pulit jong ka distrik, u Paritosh Pankaj ha ka jingkren bad ki nongthoh khubor.
Shuh shuh kumba la khmih lynti la ong ba u Myntri Rangbah ka jylla u Revanth Reddy un leit jngoh ïa kane ka jaka ha ka step sngi Balang.
Ha ka lah sngi U Blei, ka jingbthei jong u Reactor kaba la suba ba ka la mih ka jingbthei bad ka ding ha ka karkhana Sigachi Chemical Industry ha Pashamylaram.
Haba kren sha ki nongthoh khubor, u Myntri ka tnat ka koit ka khiah ka jylla, u Damodar Rajanarasimha u la ong ba kumba 90 ngut ki nongtrei ki don ha ka karkhana ha ka por ba jia kane ka jingjia.
“Ka jingbthei ka la pynpluh lut ïa ka karkhana bad ka bor jong ka jingbthei ka long kaba jur haduh katta katta ba don napdeng ki nongtrei kiba la sied sha suiñ bad ki la hap shapoh kumba 100 meter eiei,” u la bynrap.
Hadien katei ka jingbthei, la pynlong ïa ka jingleit pyllait im bad pynlip ding ha katei ka karkhana, ha kaba la lap ha katei ka por ym duna ïa ka 10 tylli ki metïap.
Katba ym pat lah ban tip ïa ka daw jong katei ka jingbthei, hynrei la suba ba ka dei na ka daw jong ka jingbthei jong ki jingktah ki dawai.
Ha ka sngi Ba-ar, ki lad pathai khubor jong ka thaiñ ki la ïathuh ba ka jingpyllait im ka dang ïaid shakhmat da ki kynhun jong ka NDRF, HYDRAA bad ka Telangana Fire Disaster Response.
U Lat ka Telangana u Jishnu Dev Varma ruh u la pynpaw ïa ka jingsngewkhia halor kane ka jingjia basngewsih. Haba ai ka jingsngewlem sha kiba haïing hasem jong kito kiba la duh noh ïa la ka jong ka jingim ha kane ka jingjia, u Lat ka jylla u la kitbok kitrwiang ïa kiba mynsaw ba kin koit noh kloi.
U Lat u la ïakren ruh bad u Principal Secretary ka tnad Labour, Employment Training and Factory (LETF) u M.Dan Kishore, bad bthah ïa u ba un pynpoi ïa ki jingkyrshan bad ki jingïarap katba lah sha baroh ki lanot kiba la ngat ha kane ka jingbthei.
