New Delhi, Naitung:
Kum ka jingïakhun pyrshah kaba jur ïa ka jingkhaïi sikret beaiñ, ka Operations Cell jong ki pulit ka Delhi ha South West District ka la leit ban pynpra ïa kawei ka kudam buh ïa ki duma ba la khang bad kem ïa ar ngut ki briew kiba donkti ha ka jingpynpoi duma, ong ka kyrwoh khubor ba la wan na ki heh pulit.
Ki la don baroh kumba 94 hajar tylli ki song sikret nabar jylla ki bym don ïa ki jingmaham ba dei ban leh ha ka koit ka khiah bad ka MRP kumba la bthah katkum ka Cigarettes and Other Tobacco Products Act (COTPA) ba la ïoh ban kurup ha ka por ba la pynlong ïa ka jingkhynra.
Ki briew kiba la shahkem, ki dei kiba la tip kyrteng kum u Parikshit (22 snem), u trai katei ka Godown bad uba shong basah ha Vasant Kunj bad u PP Chengappa (40 snem), uba shong ba sah ha Kodagu distrik ha Karnataka, la bynrap shuh shuh ka khubor ba la pyllait.
Kum ka jingpyntreikam hadien ba la ïoh ïa ka jingtip kaba bniah, ka kynhun pulit ka la leit ban khynra ïa kawei ka jaka buh kyiad bad duma hapoh kawei ka kudam kaba don ha kawei ka ïing ha Nangal Dewat, Vasant Kunj ha ka 27 tarik u Jylliew.
Kane ka jingpyntreikam ka long shi bynta jong ka Campaign ba la pynlong ha South-West District khnang ban lah ban tehlakam ïa ka jingdon jong ka kyiad bad u duma ba la khaïi beaiñ ha Delhi.
Katkum ka jingïathuh jong ki pulit, kine ki sikret kiba la ïoh kurup ki dei kiba la thmu ban sam ha kylleng ka Delhi-NCR bad ki bynta jong ka South India.
Ha ka jingtohkit, une u nongshah kynnoh u la phla ba u la wanrah ïa kine ki mar na bar ri, kynthup na Greece bad Dubai.
Ki pulit ki la ïoh kurup haduh 94 hajar tylli ki song sikret ba la shna da ki bar jylla na katei ka Basement Godown. Kine ki kynthup ïa 13,000 tylli ki song jong ka L&B Original Silver ba la thep ha ki 13 tylli ki synduk, 5,000 tylli ki song jong ka King Size Mayfair ha ki 5 tylli ki synduk, 50,000 tylli ki song jong ka Richmond King Size Real Blue ba la buh ha ki 50 tylli ki synduk, bad 26,000 tylli ki song Kingchton Size.
Ym don kawei ruh na ki song kaba don ïa ki jingmaham ba lah ban ktah ïa ka koit ka khiah ne ki dak jong ka dor die marbam (MRP) kumba la bthah katkum ka aiñ COTPA.
Hadien kane ka jingïoh kurup, la buh jingmudui ha Vasant Kunj South Police Station katkum ka ejahar No. 276/25, kaba pyndonkam ïa ki kyndon 7, 14, bad 20(2) jong ka aiñ COTPA. Baroh arngut kiba shah kynnoh ki la shah kem.
Ki pulit ki la pynpaw biang ïa ka jingkular jong ki ban pynneh ïa ka jinglong jingman kaba lait na u duma bad u drok ha ka nongbah jong ka ri bad ki la ong ba ki jingtohkit kiba kham bniah ki dang ïaid shakhmat ban buddien ïa ka kynhun kaba kham heh kaba donkti sha lyndet jong ka jingkhaïi be-aiñ.
