New Delhi, Naitung:
Ka India bad ka Pakistan ha ka Sngi Ba-ar ki la ïakylliang ïa ki thup kyrteng jong ki koidi ‘riew paidbah bad ki nongtong dohkha kumba ju long shisien shisnem, ha kaba ka New Delhi ka la kyntu ïa ka Islamabad ban pynkloi ïa ka jingpyllait ïa ki 159 ngut ki nong India kiba la dep pyndep ïa ka jingshah set patok bad ban ailad ban leit sha ki Consular ïa ki 26 ngut kiwei pat.
Ïa kane ka jingïakut la leh lyngba ki lad jingïadei kam jong ki heh ka New Delhi bad Islamabad, kum shi bynta jong ka jingïateh kular jong u snem 2008 halor ka jingïoh rung ki nongsynshar – kawei na ki khyndiat tylli ki lad treikam ba arliang mamla kiba dang don hapdeng kine ki ar tylli ki ri.
Hapoh katei ka jingïateh, baroh arliang mamla ki ïasam ïa ki jingtip jong ki koidi arsien shisnem, ha ka 1 tarik u Kyllalyngkot bad ka 1 tarik u Naitung.
Kawei pat ka lad treikam ka long ka jingpynkylla man la u snem ïa ki thup jong ki jaka buh Nuclear, kaba ju pynlong man la ka 1 tarik u Kyllalyngkot ban ïada na ka jingshah thombor ha kum kine ki jaka ha ka por ba don ki jingïaleh pyrshah.
Ka India, ka la aiti ïa ki jingtip ba bniah jong ki 382 ngut ki koidi riew paidbah bad 81 ngut ki nongtong dohkha, kiba la ngeit ba ki dei ki nong Pakistan.
Ka Pakistan, ha kajuh ka por, ka la buh kyrteng ïa 53ngut ki koidi riew paidbah bad 193ngut ki nongtong dohkha, kiba la ngeit ba ki dei ki nong India.
Ha ka kyrwoh, ka External Affairs Ministry ka la ong ba ka India ka la khot ban “pyllait kloi bad pynphai biang” ïa ki koidi riew paidbah na India, ki nongtong dohkha ryngkat bad ki lieng jong ki bad ki shipai ïada ri kiba la jah rngai kiba la shah bat ha ka jingtohkit jong ka Pakistan.
Ka New Delhi, ka la pynbor ïa ka Islamabad, ba kan pynkloi ban pynphai noh ïa ki 159 ngut ki koidi bad ki nongtong dohkha, kiba la pyndep ïa ka jingshah set phatok jong ki, bad ban ailad mardor ïa ki 26 ngut kiwei pat, kiba la ngeit, ba ki dei ki nong India, hynrei ki bym pat ïoh lad satia.
Ka India, ka la kyrpad ruh ïa ka Pakistan, ba kan pynthikna ïa ka jinglong trai ri jong ki 80 ngut ki riew shimet, kiba don ha kti jong ka India, kiba la ngeit, ba ki dei ki nong Pakistan, hynrei kiba la slem ban pynphai biang ïa ki, namar ka jingbym don ka jingpynshisha na Islamabad.
La kyntu shuh shuh ïa ka Pakistan ban pynthikna ïa ka jingshngaiñ bad jingbha jong baroh ki nong India bad kiba la ngeit ba ki dei ki nong India.
Katkum ka jingong jong ka tnad, ka jingpyrshang jong ka India ka la pynlong ban pynphai biang ïa ki 2,661 ngut ki nongtong dohkha bad 71 ngut ki koidi riew paidbah na Pakistan naduh u snem 2014, kynthup ïa 500 ngut ki nongtong dohkha bad 13 ngut ki koidi riew paidbah naduh u snem 2023.
“Ka India ka dang ïai bteng ban pynbeit, ha kaba kongsan, ïa baroh ki kam ba ïadei bad ka jinglong briew, kynthup ïa kito kiba ïadei bad ki koidi bad ki nongtong dohkha ha ka ri jong uwei pa uwei,” ong ka MEA.
Ka jingïadei hapdeng ki ri ba marjan ka la nang sniew hadien ka jingshah thombor ha u bnai Ïaïong ha Pahalgam, kaba la pynlong ïa ka India ban pynjari ïa ki lad jingïadei bad ka ïoh ka kot pyrshah ïa ka Pakistan kynthup ïa ka jingpynsangeh ïa ka jingïateh kular jong ki um Indus ha u snem 1960.
