New Delhi, Naitung:
U Myntri Rangbahduh u Narendra Modi, u la leit ban leit jngoh ïa ki san tylli ki ri. Ha kine ki phra sngi ban wan, ha kaba un leit jngoh ïa ka ri Ghana, Trinidad and Tobago, Argentina, Brazil bad Namibia. Kane ka jingleit jngoh kan long ruh ka jingleit jngoh kaba jrong tam jong u Myntri Rangbahduh lajan 10 snem mynta.
“Ha kine ki khyndiat sngi ban wan, ngan leit sha ki prokram bapher bapher kiba don ha Ghana, Trinidad & Tobago, Argentina, Brazil, bad Namibia. Nga khmih lynti ban ïakynduh bad ki nongïalam jong ka pyrthei bad ban ïakren ïa ki lad ki lynti ban pynbha ïa ka pyrthei jong ngi,” la ong ka kyrwoh ba la pynmih da u Myntri Rangbahduh.
Ka jaka sah kaba nyngkong eh ha kane ka jingleit jngoh ïa kine ki san tylli ki ri ka dei ka Ghana, kaba kan dei ka jingleit jngoh kaba nyngkong eh jong u Myntri Rangbahduh ka India lajan lai phew snem.
Hadien ka Ghana, u Myntri Rangbahduh, u thmu ban leit jngoh ïa ka Trinidad and Tobago, kaba long ka sien kaba nyngkong eh jong u nongïalam ka India, ha ki 27 snem. Hadien ka jingsangeh ha Caribbean, u Modi, un leit sha Argentina, halor ka jingkhot jong u President Javier Milei. Kane ka jingleit jngoh sha Argentina kan dei ruh ka sien kaba nyngkong eh ha ki arliang mamla hadien 57 snem.
Na Argentina, u Myntri Rangbahduh un leit sha Brazil ban ïashim bynta ha ka BRICS 2025 Summit.
Ka jaka sah kaba khatduh ha ka jingleit jngoh ka long ha Namibia, kaba dei ka jingleit jngoh kaba nyngkong eh jong u Myntri Rangbahduh hadien 27 snem. Ha kane ka jingleit jngoh jong u, u Modi un sa ïakynduh ïa u President u Netumbo Nandi-Ndaitwah bad un ai jingkren ha ka ïingdorbar jong ka Namibia.
Kane ka jingleit jngoh, ka ban sdang na Ghana, kan long ka jingleit jngoh kaba jrong tam jong u Myntri Rangbahduh lajan 10 snem.
Ka jingleit jngoh kaba khatduh jong u Modi kum u Myntri Rangbahduh ka ri, ka long ha u snem 2016, ha kaba u la leit jngoh ïa ki ri America, Mexico, Switzerland, Afghanistan, bad Qatar.
