Jammu, Naitung:
U Lt Governor ka Jammu & Kashmir u Manoj Sinha ha ka sngi Balang u la pynher lama ia ka kynhun nyngkong jong ki riewngeit ban ïashim bynta ha ka Amarnath Yatra mynta u snem na Jammu na ka bynta ka Valley namar kane ka jing-leit ïaid riewblei kaba 36 sngi ka la sdang ha ka sngi kaba bud ka sngi Palei.
Hapdeng ki jingpyrta ‘Bharat Mata Ki Jai’, ‘Bum Bum Bhole’ bad ‘Barfani Baba Ne Bulaya Hai’, ki nongïaid riewblei kiba shlur na ki bynta bapher bapher jong ka ri ki la mih ha ki ar tylli ki kynhun ba la synran na Bhagwati Nagar Yatri Gastrict Niwas ha Canal Road ha Jammu na ka bynta ki ar tylli ki jaka ba don ka Yatra jong ka Pahalgam ha Anantnag distrik bad Baltal ha Ganderbal distrik.
La synran lang ïa u Lt Governor da ki heh ophisar bad pulit ha ka por ba u pynher lama ïa ka kynhun ba nyngkong jong kane ka Yatra mynta u snem na ka bynta ka them Amarnath.
Ki tyllong khubor ba thikna ki ïathuh ba “Baroh ki don 5,892 ngut ki nongïaid riewblei kiba la leit phai ha ki ar tylli ki kynhun ba la synran lang na ka bynta ka Shri Amarnath ji Yatra naduh hynnin ka sngi. Na kine, 3403 ngut ki nongleit ïaid riewblei sha Nunwan (Pahalgam) Base Camp katba 2,489 ngut pat ki leit sha Baltal Base Camp”.
La pynbiang ïa ka jingïada kaba ym pat ju ïohi mynno mynno ruh ïa ka Amarnath Yatra mynta u snem, namar kane ka jia hadien ka jingshah thombor ha Pahalgam ha ka 22 tarik. Ïaïong, ha kaba 26 ngut ki riew paidbah ki la shah pynïap ha ki lehnoh Lashkar-e-Taiba (LeT) ba la kyrshan da ka Pakistan.
La pyntreikam sa 180 tylli ki kynhun jong ki CAPF ban pynjur ïa ka rukom pahara kaba la don lypa kaba kynthup ïa ki shipai, ki bor pahara bad ki pulit ka J&K.
Ka Yatra ka sdang ha ka Sngi Palei bad kan kut hadien 36 sngi ha ka 9 tarik Nailar, kaba ïahap bad ka tamasa Shravan Purnima bad Raksha Bandhan. Ki riewngeit ki la ïaid ban poi sha ka krem kaba kyntang kaba don ha ka kynjang kaba 3888 metre na sla duriaw bad ruh na ka surok Pahalgam ne ka lynti ïaid ba pynlyngkot ka Baltal.
Kito kiba pyndonkam ïa ka lynti Pahalgam ki ïaid na Pahalgam sha Chandanwati, Sheshnag bad Panchtarni ban poi sha ka krem kyntang, ki shim por saw sngi ban ïaid ïa ka lynti kaba jngai kaba 46 km. Kito kiba pyndonkam da ka lynti Baltal ki leit phai biang sha ka jaka sah ha kajuh ka sngi hadien ba ki la ïoh ‘darshan’ hapoh ka krem, da kaba ïaid ïa ka lynti kaba jngai 14 km.
Ka jaka mane blei jong ka krem ka don ïa ka jingtei jong u maw da u thah uba nang rit bad nang sngur ryngkat bad ki por jong u bnai. Ki nongmane ki ngeit ba ka jingtei jong u maw thah ka pyni ïa ki bor ba phylla jong u Lord Shiva.
