Shimla, Naitung:
Ka jingshlei um bad ka jingjur slap kaba la neh baroh shimiet ka la lynshop ïa ka Mandi distrik jong ka Himachal Pradesh ha kaba 13 ngut ki briew ki la ïap, katto katne ki la mynsaw bad 29 ngut ki dang jah rngai, la ïathuh ki heh sorkar ha ka sngi Balang. Ka jinglong ka suiñbneng kaba jur ka la wanrah ïa ka jingthut kaba jur, ha kaba la ïathuh ba la don ka jingjulor kaba jur ha kylleng ka thaiñ.
Ka jylla ka la sakhi ïa ki 11 tylli ki jingjia jong ka jingjur slap, saw tylli ki jingshlei um bad ka jingtwa khyndew kaba jur ha ka sngi Ba-ar, kiba bun na kine ki dei ha ka Mandi distrik. Tang ka Mandi ka la ïoh ïa ka jinghap slap kaba kham heh bha kaba long 253.8 mm naduh ka janmiet jong ka lah sngi U Blei.
Ka jingpyllait im ka dang ïaid shakhmat ha kylleng ki jaka ba shah ktah. Ar tylli ki kynhun kawei kawei na ki shipai National Disaster Response Force (NDRF) bad State Disaster Response Force (SDRF) la buh ha Gohar, Karsog bad Thunag, ki nongbah kiba la shah ktah bha ha ka jylla.
Haduh mynta, ki la don kumba 316 ngut ki briew kiba la shah pyllait im tang na Mandi, ha ki 32 kynta ba la leit haduh ba la thoh ïa ka khubor, katba ka jingdon jong ki briew kiba la pyllait im ha kylleng ka jylla, ka la kiew sha ka 332 ngut, ba kynthup ïa 51 ngut ha Hamirpur bad 3 ngut ha Chamba, ong ki heh pulit.
Katkum ka jingkheiñ jong ka State Emergency Operation Centre (SEOC), 24 tylli ki ïing ki sem, 12 tylli ki sem masi, kawei ka jingkieng bad katto katne ki surok ki la shah pynjulor.
Kumba 406 tylli ki surok ki la khang mynta ha baroh kawei ka jylla, ha kaba ka Mandi ka don 248 tylli na ki.
Ka jingpynbiang bording ruh ka la shah ktah jur, ha kaba 994 tylli ki Transformer ki la thut ha Mandi distrik.
La ïathuh ba bun ngut kiba ïap na ki jaka bapher bapher, san ngut ha Gohar, iwei ha Old Karsog Bazaar, iwei ha Thunag, iwei ha Pandav Sheela, iwei na Dhar Jarol bad kawei ka metïap la ïoh na Neri-Kotla, Jogindernagar. Laiphew tylli ki masi ruh ki la ïapna ka daw ka jingshlei um.
U Deputy Commissioner jong ka Mandi, u Apoorv Devgan, u la ong ba ki kynhun ai jingïarap, ki pulit bad ki Home Guard ki dang trei baroh shisngi ban wad ïa ki briew kiba jah bad ban pynkynriah ïa ki longiing kiba shah ktah sha ki jaka ba kham shngaiñ, ong ka tyllong khubor.
Baroh ki wah bah bad ki wahduid ha Mandi ki la bteng ban ïaishlei katba nang mih ki sngi naba bteng ka jinghap slap .
Ki la don palat 1.5 lak cusec ka um la pyllait na ka dam Pandoh hadien ba ka jingkiew jong ka ka la kiew da kaba shyrkhei sha ka 2,922 phut, kaba jan poi sha ka dak jingma kaba 2,941 phut.
Ka surok Four-lane ka Chandigarh-Manali ka dang sahkut ha kiba bun ki jaka, kynthup ïa ka Nine Miles, Dwada, Jhalogi bad Banala. Kawei pat ka lynti Kamand-Kataula-Bajaura ka plie tang ïa ki kali rit, kaba wanrah ïa ka jingthut kaba khraw ha ka leit ka wan.
Ha Hamirpur, la ïoh ban pyllait im ïa 51ngut ki briew, ba kynthup ïa 30 ngut ki nongbylla, na ka shnong Ballah, hadien ba ka um kaba kiew jong ka wah Beas, ka la pynshlei ïa ki jaka ba rit.
Ka jingjulor jong ki ïing kutcha, ki pipe um bad ki Cable, ka la ïathuh ha Hamirpur ruh kumjuh, ha kaba ki bynta jong ka surok Sujanpur Tira- Sandhol, ki dang sahkut namar ka jingshlei um.
Ïa ki skul la khang ha Mandi bad Hamirpur ha ka sngi Ba-ar, hynrei ki don ki khynnah skul kiba la dep ban poi sha ki kamra klas jong ki shwa ban pynbna ban khang ïa ki skul, la ïathuh ki nongshong shnong.
U Myntri Rangbah ka Himachal, u Sukhvinder Singh Sukhu, u la ong ba ka jylla ka la mad ïa ka jingduhnong kaba la antad kumba 500 klur tyngka naduh ba sdang u slap ha ka 20 tarik u Jylliew.
U la kubur ïa ka jingkiew kaba sngewkhia jong ki jingjia halor ka jingther u slap ha kine ki snem ba la dep bad u la kyntu ïa ki briew ba kin kiar ban leit sharud wah bad ki nala um.
