Panaji, Naitung:
Ka Directorate of Enforcement (ED), Panaji Zonal Office, ka la bat shipor ïa ki mar ki mata kiba shongdor haduh T. 60.05 klur ha kaba ïadei bad ka jingtohkit jong ka kaba dang ïaid shakhmat pyrshah ïa u Estevan Dsouza bad kiwei pat katkum ki kyndon jong ka Prevention of Money Laundering Act (PMLA), 2002.
Kane ka jingleh ka dei ka sienjam kaba kongsan ha kaba ïakhun pyrshah ïa ka jingshah kynnoh ba ka dei ka jingleh thok ïa ka jaka kaba heh bha kaba kynthup ïa ki kot ki sla thok bad ki jingkhaïi thok ha Goa.
Ka kynhun ED ka la sdang ïa ka jingtohkit da kaba pynshong nongrim ha ki jingujor ejahar kiba bun ba la ujor da ki pulit ka Goa pyrshah ïa u Estevan Dsouza bad ki paralok jong u.
Ïa kine ki ejahar la ujor hapoh ki kyndon bapher bapher jong ka Indian Penal Code, 1860, halor ki kam runar kiba shyrkhei kynthup ïa ka jingleh thok bad shukor.
Ki jingkynnoh ki long halor ka jingpynkylla be-aiñ ïa ka jinglong trai ïa ka jaka da kaba pyndonkam ïa ki kot ki sla thok.
Katkum ka jinglap jong ka jingtohkit jong ka kynhun ED haduh mynta, la ngeit ba u Estevan Dsouza u dei u briew uba kongsan ha kane ka kam thok.
La kynnoh ba u la treikam ha ka jingïatreilang bad u Md. Suhail bad katto katne ngut kiwei pat ban pynlong ïa ka jingleh thok kaba ryntih kaba kynthup ïa ka jingpynkylla bad shna thok ïa ki kot ki sla kiba ïadei bad ka jaka.
Kine ki kynthup ïa ki kot die thok bad kiwei kiwei ki kot aiñ, kiba hadien la pynlong kum ki kot kiba shisha ban pynsuk ïa ka jingshim be-aiñ ïa ki mar ki mata kiba rem dor bha.
Ïa ki kot ki sla kiba la thok la pyndonkam ban pynpaw bakla ïa ka jinglong trai bad ban thaw ïa ka jingsngew ba bakla jong ka jinglong hok ha ki jingkhaïi marpoh khyndew ba la pynlong da ka kynhun.
Ki jaka ba la pyndait kum shi bynta jong ka jingleh mynta la bat ha ka kyrteng jong ka Rosa Maria Dsouza, kaba dei ka kmie tymmen jong u Estevan Dsouza. Kane ka jingpynngat kaba thymmai ka long hadien ka hukum pynngat kaba hashwa ka Provisional Attachment Order (PAO) kaba la pynmih ha ka 8 tarik u Naiwieng, 2023, hapoh ka shongdor da T.11.82 klur. Ïa ka hukum kaba hashuwa la pynskhem da ka Adjudicating Authority ha ka 8 tarik. Ïaïong, 2024.
Ki jingdon jingem ba la pynïasoh thymmai ki kynthup ïa ki jaka ba don ha ka shnong Pilerne ha ka thaiñ Bardez kaba don ha ka bynta ba shaphang Shatei jong ka Goa.
Ki heh ka kynhun ED ki la pynpaw ba ïa kine ki jaka la lap ba la ïoh be-aiñ da kaba pyndonkam ïa ki kot die thok bad ki kot ki sla ba la shna thok.
Ki jingpynrung ki long katkum ka jingpynbeit jong ka tnad ba ki jaka ba la kdew ki dei ki jingmih na ki kam runar katkum ka PMLA.
Da kane ka jingleh kaba thymmai, ka dor baroh jong ki jaka ba la pynïasoh bad kiba ïadei bad u Estevan Dsouza bad ki paralok jong u, mynta ka la palat ïa ka T.71 klur.
Ka jingtohkit jong ka kynhun ED ka thmu ban lap ïa ka jingheh ba pura jong ka jingpynmih pisa bad ban wad ïa baroh ki mar ki mata kiba la ïoh na ki jingkhaïi beaiñ ïa ki mar ki mata.
Ka jingtohkit kaba kham bniah ka dang ïaid shakhmat, bad ki heh jong ka kynhun ED ki la pyni ba ki briew shimet kiba donkti ha ka jingshah kynnoh thok jaka ki lah ban wan hapoh ka jingpeit bniah katba nang ïaid ka mukotduma.
