New Delhi, Naitung:
Ka tnat ka koit ka khiah jong ka sorkar pdeng ha ka sngi Balang ka la pynskhem ba ki jingtohkit ba bniah ba la pynlong da ki jaka wad bniah ha ka liang ka koit ka khiah ba ha khliehduh jong ka ri India kim shym la lap ïa kano kano ka jingïadei hapdeng ki dawai COVID-19 bad ka jingjur jong ki jingïap ba kynsan-kynsan jong ki briew ba dang shen, kynthup ïa ki jingïap ba ïadei bad ka jingpang klong snam, hapdeng kiba la heh la san.
Kane ka jingpynbna jong ka tnad ka long hadien ka jingwad kaba bniah bha kaba la leh da ka Indian Council of Medical Research (ICMR) bad ka All India Institute of Medical Sciences (AIIMS) kaba la wad bniah bha ïa ki briew kiba ïap kynsan hadien ka jingpang COVID.
“Ki jingpule ba bniah jong ka ICMR bad AIIMS halor ka jingïap kynsan jong ki rangbah hadien ka COVID ki la pynshisha da kaba shai ba kam don jingïadei hapdeng ka jingïap kynsan bad ki dawai COVID-19,” la ong ka tnat ka koit ka khiah ha ka sngi Balang.
Ka jingpynbna ka la bynrap ruh, “Ki jingpule jong ka ICMR bad NCDC ki la pynshisha beit ba ki dawai pyrshah COVID-19 ki long kiba koit ba khiah bad kiba treikam bha ryngkat bad ki jingjia kiba duna jong ki jingktah kiba jur bha.”
Kine ki jingwad bniah ki lap ïa ki lad rukom im, ka jinglong ba lah ban shah ktah ha ki Gene, bad ki jingpang kiba don hapoh jong ki kum ki daw ba kongsan ha ka jingïap kynsan khlem da poi pyrkhat.
Watla ka jingpang klongsnam ka dang long ka daw bah jong ka jingïap kynsan hapdeng ki rangbah, hynrei ka jinglong jong ki daw kam shym la kylla than na kiwei pat ki snem, la pyni da ki jingpeit bniah ba hashwa.
Ka jingpynbna na ka sorkar ka wad ban pynduna ïa ki jingsngewkhia kiba la saphriang bad ki jingtip ba lamler kiba la bna ba don ka jingïadei ka jingai tika COVID-19 bad ki jingjia ba ktah kynsan kynsan, kaba pynduh jingshaniah ïa ki paidbah ha ka jingai ïa ki dawai ïada.
