New Delhi, Naitung:
Ka Ministry of External Affairs (MEA) ha ka sngi Balang ka la pynthikna ba ka la don ka jingshah rahbor jong lai ngut ki nong India kiba trei ha ka karkhana Diamond Cement ha ka nongbah Kayes jong ka Mali hadien ka jingthombor ki runar ha ka 1 tarik, Naitung.
Ka Sorkar India, ka la pynpaw ïa ka jingsngewkhia kaba jur halor katei ka jingjia bad ka la khot ïa ki bor ba dei peit ha Mali, ba kin shim ïa ki lad ki lynti kiba kyrkieh bad kiba biang ban pynthikna ba kin ïoh ban pyllait noh da kaba suk bad kham kloi katba lah.
Ha ka jingpynbna ba la pynmih ha ka Sngi Ba-ar, ka MEA ka la ong ba ïa kiba shah rahbor la shim da ka kynhun ki nongleh kam sniew ki bym lah ban ithuh kiba la rung tuh sha ka jaka jong kane ka karkhana. Kane ka jingshah rahbor ka la jia hapdeng ka jingshah thombor kaba kham jur jong ki lehnoh kiba la ïatreilang kiba la thmu ïa ki jaka treikam jong ki shipai bad ki jaka sorkar ha kylleng ka thaiñ Sepngi bad marpdeng jong ka Mali ha kajuh ka sngi.
“Ka Sorkar India ka pynrem khlem jingartatien ïa kane ka jingleh donbor bad ka khot ïa ka Sorkar Mali ban shim ïa ki lad ki lynti baroh ban pynthikna ïa ka jingpyllait im kaba suk bad kaba kloi ïa ki nong India kiba la shah rahbor,” la ong ka MEA.
Ka Embassy jong ka India ha ka nongbah Bamako ka ïatreilang bad ki bor synshar jong ka Mali, ki bor pynjari aiñ ha ka thaiñ, bad ki nongpynïaid jong ka karkhana Diamond Cement. Ka embassy ka dang pynneh ruh ïa ka jingïakren bad ki bahaïing jong ki nongtrei kiba shah rahbor, da kaba ai jingtip bad jingkyrshan.
“Ka jingshngain, jingïada bad ka jingbha jingmiat jong ki nong India kiba don shabar ri ka dang long ka mat kaba kongsan tam ba la dei ban khmih shwa,” la ong ka MEA.
