Bengaluru, Naitung:
Ki nongrep kiba sah ha ka thaiñ ba la don ka jingthmu ban wanrah ïa ka Aerospace Project ha Devanahalli ki la rai ba kin sa ï ai bteng ïa ka jingïakhih, kam pher la ka slem ne shim por ruh. Ki nongrep ha kane ka thaiñ ki la pynpaw ïa kiba bun ki jingeh ba kin ïakynduh lada pynïaid shakhmat ïa kane ka project, ha kaba ïadei bad kane, uwei u nongrep u la ong, “Nga la dep duh ar akar na ka jingshim jaka ha u snem 2018-19 na ka bynta ka Defence and Aerospace Park, kaba la pyntip ha u snem 2014. Mynta, ki pyrshang ban shim noh ïa ka jaka kaba 1.5 akar kaba nga dang sah sa tang bad nga”, la ong u Jagadish, u nongrep uba don ha ka jingeh na Polanahalli ha Channarayapatna Hobli.
Ïa ka jingsngewsih jong u la ïasam lang da ki spah ngut ki nongrep ha kylleng ki 13 tylli ki shnong, kiba la ïoh ïa ki jingpynbna na ka KIADB na ka bynta ban ïoh ïa ka jaka kaba 1,777 akar na ka bynta ka projek Defence bad Aeropsace Park.
Ha ka jingleit jngoh ïa kine ki jaka rep, ka TNIE ka la sakhi ïa kawei ka jingsngew kaba la sawa lyngba ka thaiñ, “Ngin sa ïap lada ngi hap, hynrei ngin ym pyllait ïa ka jaka jong ngi.” Ki ong ba ki la duh noh ïa ka kamai kajih hadien ba ki la ai ïa ka jaka jong ki na ka bynta ki projek kiba kham hashwa.
U Jagadish u la ong, “Ka sorkar ka la kular ban siew 1.1 klur tyngka shi akar. Nga la ïoh tang 80 lak tyngka, bad kata ruh ka la kham slem ar snem, ha u snem 2020. Ki la kdew ïa ki jingeh ha ki kot ki sla katba ha ka jingshisha ka dei tang ka daw ban pynslem ïa ka jingsiew bai lutksan bad ngi la shah pynbor ruh ban siew pisa tuh sha ki Agent kiba shim bai lutksan na ka.”
U nongïalam jong ki nongrep u Ramesh Cheemachanahalli u la kynnoh ba na ka 1,282 akar ba la ïoh kham mynshwa, hadien la ai jaka sha ki riewshimet kum ka Brigade Builders (73 akar), ka Chanakya University (116 akar), ka IFFCO Nano Urea (13 akar) bad ka karkhana pynmih Battery kaba don ha ka jaka ba la buh ha ka jingïoh.
Ha Mattabaralu, U Parvathamma, uwei pat u nongrep uba la shah ktah, u la pynpaw ïa ka jingduh jingkyrmen ïa ka sorkar kmie bad ong, “U Siddaramaiah u la kular ban weng noh ïa ki jingpynbna lada u wan ha ka bor. Hynrei ym shym la leh eiei.”
U Karalli Srinivas, u nongïalam jong ki Dalit bad u nongkhot ïa ka komiti pyrshah ïa ka jingshim jaka, u la ong, “Ka jingjur jong ka jingïakhih ka long namar ba ki nongrep mynta ki ïohi ïa ka jingshisha. Kito kiba la aiti ïa ka jaka ki shem jingeh, ym don kam don jam, ym don lad kamai. Baroh kaba ki tip ka long tang ban rep bad mynta ki long ki nongtrei ha ka jaka jong uwei pat.”
Ki nongrep bad ki nongïakhih ki la pynbna ba ka jingïakhih jong ki kan dang ïai bteng, wat la kan shim por katno katno ruh. Ki nongshong shnong kiba shah ktah na ki 13 tylli ki shnong jong ka Channarayapatna kin rakhe ïa ka jinglehniam kaba shisngi ha ka jaka ïakhih ha Devanahalli ha ka sngi Balang. Da ka jingpyrta “Ka jingim jong ngi ka don ha kane ka ri, ka lawei jong ki khun jong kane ka khyndew ka don ha ki kti jong phi,” kane ka jingleh niam ka long ban kyntu ïa ka sorkar ban kyntait ïa ka jingthmu shim jaka ha ka jingïalang ba kyrpang jong ka kynhun Myntri jong ka.
