Chennai, Naitung:
Haba pyllait bad pynsngew ïa ka jingthmu jong ka Oraniyil Tamil Nadu ha ka Sngi Ba-ar, ha kaba ki dkhot jong ka DMK kin poi sha man la ki longïing haman la ki jaka thep Vote ha kylleng ka jylla, u President ka seng bad u Myntri Rangbah ka jylla u M K Stalin u la ong ba ka don ka lad ba kiwei pat ki seng kin ïasoh bad kane ka jingïateh lok. U la ong, “Ngin sa ïakren bad rai ynda la wan kata ka jinglong jingman.”
Haba jubab ïa ka jingkylli halor ka jingdawa jong ki seng synrop ban ïoh kham bun ki MLA, u la ong, “Hadien ba la pynbna ïa ka ilekshon, ngin sa shong bad ïakren ïa kane. Ngin sa ïakhun ïa ka.”
Haba kylli halor ka jingïap jong u Sivaganga ha patok, u Myntri Rangbah u la ong, “Tang shu tip ïa kane, ngi la shimkhia ban leh ei ei.
Ki la shahkem bad ka jingpynshitom ka la long ruh pyrshah ïa ki heh sorkar.”
Haba batai bniah ïa ka Oraniyil Tamil Nadu, u la ong ba ka dei ka jingpynïasoh lang ïa ka jingïalap ilekshon, ka jingpynlong dkhot, ka jingpyrshang ban batai ïa ki jingshet kylla jong ka sorkar pdeng, bad ka rynsan ban pynpaw ïa ki jingjop jong ka sorkar DMK.
Halor ka jingleit jngoh ba khah-khah jong u Myntri ka sorkar pdeng uba dei khmih ïa ka tnat ki kam pohïing u Amit Shah sha Tamil Nadu, u Stalin u la ong, “U Myntri Rangbahduh ka ri u Narendra Modi bad u Amit Shah ki dei ban wan kham bunsien sha Tamil Nadu. Ki briew ki tip ba ki pynphriang ïa ki jingthok bad kata ka kylla long ka jingmyntoi ïa ngi ha ka por ilekshon. Kumjuh ruh ym dei ban pynkylla ïa u Lat ruh.”
Haba kylli hato ki dkhot jong ka DMK kin leit ne em sha ïing jong u General Secretary ka AIADMK, u Edappadi K Palaniswami kum shi bynta jong ka jingïalap paidbah kaba dang shu sdang thymmai, u Stalin u la ong, “Ka shong ha ka jinglong jingman. Lada nga don ha katei ka thaiñ, ngan jin da la leit.”
Shwa kane, haba batai halor ka jingdonkam jong ka Oraniyil Tamil Nadu, u la ong, “Shisien peit, ka jingïakhih ka lah ban paw kum ka jingïakhun ban pynlong dkhot ïa ka DMK. Hynrei ka jingthmu bashisha jong ka ka dei ka jingbha jingmiat jong ka Tamil Nadu. Ngi la dei ban pyni ba lada ka Tamil Nadu ka ïeng tylli, ka bor saiñ hima-sima kaba shlur ka long kaba donkam eh ban thaw ïa kata.”
Ha kane ka sngi la don lang u Secretary jong ka kynhun seng ki samla ka DMK uba dei ruh u Symbud Myntri Rangbah u Udhayanidhi Stalin, u nongpynïaid ïa ka pisa jong ka seng bad u MP u T R Baalu, u Secretary jong ka seng DMK u R S Bharathi bad ki heh jong ka tnad treikam jong ka seng DMK.
