Ap jingma ki seng pyrshah bad seng synrop ba ïatylli biang u Raj bad u Uddhav

Mumbai, Naitung:

Hadien ba u heh ka seng Shiv Sena (UBT) u Uddhav Thackeray bad u heh jong ka seng MNS u Raj Thackeray ki la ïatyllilang bad ïasngewthuh jingmut biang hadien 20 snem ba ki la lyndet uwei-ïa-uwei pat, kiba bun na ki seng ba pyrshah bad ki seng ba ïatreilang ki la sngew ba ki don ha ka jingma.

U Uddhav Thackeray bad u Raj Thackeray ki la ïasam lang ha ka sien kaba nyngkong ha ki 20 snem, da kaba pyni ïa ka jingïatylli jong ki bad rakhe ïa ka jingjop halor ka rai jong ka sorkar Mahayuti ban pynphai biang ïa ka polisi ban kren lai tylli ki ktien.

Kine ki shipara ki la ai jingkren paidbah ha ka NSCI Dome ha Worli kaba don ha Mumbai, da kaba pynpaw ïa ka jingkren kaba kongsan da ka jingpynpaw ïa ka jingïatreilang jong ki ha ka saiñ hima-sima. 

U heh ka seng Shiv Sena (UBT) bad u khun jong u Babasaheb Thackeray, ki la ai ka jingkren ha ka por jong ka jingïalang ban pyni ïa ka jingjop jong ka jingïaid paidbah bad  ong ba ki la ‘wan lang ban ïasah lang’. Katba ka jingwan lang jong ki ka lah ban long ka mat kaba kongsan bha na ka bynta ki nongïaleh pyrshah bad ki seng ba la ïatreilang jong ki ha ka saiñ pyrthei kumjuh.

Ka Bharatiya Janata Party (BJP) ka la jop 132 na ki 288 tylli ki seat ha Maharashtra ha ka ilekshon sha ka ïingdorbar thawaiñ jong ka jylla ha u snem 2024. Da kane ka jingjop, ka seng ka la pynskhem ïa ka jingsynshar jong ka kum ka seng bahakhlieh duh. Hynrei, da ka jingïakynduh biang jong kine ki shipara, ki don katto katne ki jingeh kiba ki hap ban ïakynduh.

Ka ilekshon Brihanmumbai Municipal Corporation (BMC) kaban sa long shen, kan dei ka mat kaba kongsan bha na ka bynta ka BJP, ha kaba ka Shiv Sena (UBT) bad ka Maharashtra Navnirman Sena (MNS) jong u Raj Thackeray, ka lah ban long kaba lah ban pynkylla ïa ka jingïaleh na ka bynta ka jingsynshar donbor jong ka BJP ha Maharashtra.

Hadien ka jingïalang jong ki shipara kiba la ju ïaleh pyrshah teng, u Myntri Rangbah ka Maharashtra, u Devendra Fadnavis, u la pynpaw ïa ka jingsngewnguh ïa u Raj Thackeray, uba la ai burom ïa u, na ka bynta ka jingïakynduh biang jong ki, namar ba u dei ban ïoh ïa ka jingkyrkhu jong u Balasaheb Thackeray.

U la kynnoh ruh ba u Raj bad u Uddhav ki la bishni ïa ka jingtreikam jong ka kynhun synrop Mahayuti.