Australia, Naitung:
Kawei ka nong Australia ka la pyniap ia ki kmie ki kpa bad ia ka kurim ba ar jong u tnga jong ka da kaba ai bih ha u tit ba la ai bam ia ki. Ia kane la lap da ka kynhun bishar ha ka Sngi Nyngkong ha ka jingkut jong ka jingbishar kaba dei khmih haba iadei bad kane ka mat.
La ong ba katei ka briew ka long ka nongshet kaba tbit bha ha ïing, la ithuh ia ka kum ka Erin Patterson bad ka la khot bam sngewbha ia ki baha-iing-bahasem bad ki baieid-bathoiñ jong ka ha u Naitung jong u snem 2023, kaba la sdang da ka jing-iakynduh lang kaba sngewtynnad ha ryngkat ki jingduwai. Hynrei kane ka jingialum lang jong ki, ka la kut noh hadien ka jingiap jong 3 ngut ki nongleit sha ka iing jong ka ha katei ka jingjia.
Hadien ka jingpyrshang shitom jong ki bor ka aiñ, kaba la neh palat ar bnai mynta, ka Patterson ka la phla ba ka la kum shet da ki tit kiba la sniew ha katei ka jingtah ba ka la shet bang bha bad ka doh masi.
Hynrei ka kynhun jong 12 ngut ki nongbishar, ha ka Sngi Nyngkong ka la lap ba katei ka longkmie 50 snem ka rta, ka don kti ban pyniap ia kitei 3 ngut ki bahaiing jong ka ha katei ka jingjia.
La ong ba kane ka la jia ha ka 29 tarik u Naitung, 2023, ba ka Patterson ka la khot sngewbha ia kitei ki bahaiing jong ka ban iabam sngewbha ha iing jong ka.
